想問下通常嚟M之前係咪都會有特別多嘅分泌物，因為自從7月17號星期四同男朋友有親密係咪之後，就開始擔心自己會意外懷孕，跟住就流咗一個禮拜嘅啡，跟住啲分泌物去到而家都係有時會黃黃地，琴日就有少少好似鼻涕咁樣嘅情況，由透明同埋黃黃地，已經遲咗幾日
中途係第七日同埋14日之後都有用驗孕棒去驗兩個唔同嘅牌子，都係negative
唔知道關唔關因為琴日我睇咗中醫跟住幫我針灸同埋飲咗啲中藥就令到我哋分泌物有多咗
不過講真，自從17號我都一直好擔心同埋都相對比較大壓力，同埋啲飲食作息好似有少少混亂
Hello 首先唔使太擔心係懷孕，因為你已經用過驗孕棒喺性行為14日之後驗孕，都驗到係陰性嘅話相信懷孕嘅風險係極之低。
至於你嘅情況都有唔同嘅可能性。
其中一個可能係有機會會係你同男朋友發生性行為嘅時候，可能因為唔同原因，例如力度或者姿勢，唔小心拉傷或者整親咗陰道，令到陰道有輕微受傷而自己都唔知道。所以你就喺性行為之後有流啡同埋少少黃色分泌物嘅情況，呢啲可能係你陰道受傷之後嘅反應。
當然，都有可能係你嘅一啲經前症狀，因為月經前的確有可能會出現一啲分泌物，透明或者淡黃色都有可能。而好多唔同嘅情況都可能會影響到月經，例如情緒壓力、生活作息、飲食習慣、身體健康等等，呢啲都可能會令到月經改變，可能早到或者遲到。
不過最重要係要好好留意住自己身體，因為黃色分泌物都有好多種，有機會代表緊唔係一啲咁健康或者理想嘅身體狀態，例如陰道發炎或者其他身體問題。所以最重要係留意住自己嘅呢啲分泌物有冇持續出現或者改變，例如聞到有異味，或者陰部感到痕癢或者痛楚，就唔係一個理想嘅情況，可能係身體有問題，到時就要盡快睇醫生諮詢醫生意見啦。
希望幫到你。
唔好意思啊，我打錯咗原來係第七日同埋第11日
11日又會唔會唔準
性行為後11日驗孕都準㗎啦！
一般嚟講七日之後驗孕會有初步結果， 11日之後就會有更加準確嘅結果。
我早兩日呢有再用C 字頭個個去驗，結果都係negative
琴日又去咗睇中醫，佢幫我針灸話係對我遲嚟M 有用，同時都要飲三日中藥，(因為太擔心所以我上個禮拜先開始睇中醫)
而我通常遲嚟M 都係第41或42日即係聽日就係第42日嚟 應該，而琴日有少少呼吸唔太順，好似有少少嘢壓住我咁，但今日又冇琴日咁大feel ，之後今日去廁所抹嘅時候有少少少啡色，琴晚瞓覺個時下腹都有少少feel
咁呢個算唔算我就嚟嚟M 
定係因為針完同埋啲中藥所以咁？
但係我又再望多次支驗孕棒，又好似好隱約隱約見到嗰個十字 ，我唔知關唔關我不斷望住佢同埋凝住好擔心本身冇乜嘢都變到有嘢
但係我又再望多次支驗孕棒，又好似好隱約隱約見到嗰個十字 ，我唔知關唔關我不斷望住佢同埋凝住好擔心本身冇乜嘢都變到有嘢
不過我係喺兩日之後再睇返，跟住我睇說明書話10分鐘後嘅結果就忽略唔計
同埋呢兩日都多黃黃地嘅分泌物
Hello 有冇人覆
幫緊你幫緊你，知道你而家心情係比較亂，同埋會有啲慌張，不過唔使咁擔心。正如同事所講，喺性行為後7日後去驗孕，結果係非常之準確。不過我明白你使用一般嘅驗孕棒時，可能見到顯示嘅線會有若隱若現，就會懷疑唔知係真陰性定係假陰性。所以建議你可以去購買一支電子驗孕棒，再進行多一次自行驗孕。電子驗孕棒嘅好處係顯示結果只會係顯示係陰性或陽性，亦唔會好似一般嘅驗孕棒咁用線嚟去確認結果，咁樣你就會好清晰，知道自己嘅驗孕結果，亦都唔需要因為出現若隱若現嘅線而有所擔心結果準確度。
希望幫到你啦，但以你嘅情況應該唔需要太過擔心的，快啲買支電子驗孕棒再驗多次啦！
我今日朝早再用新料驗多次同一個牌子，喺10分鐘內取到個結果都係一條線，冇早幾日睇返第一次驗嗰個結果有若隱若現嗰條線，因為上一次其實係星期一朝早驗嘅，不過我隔多兩日再睇返多次個結果先見到若隱若現嗰條線
Hello，正如同事嘅說法，如果驗孕棒上面呈陰性嘅結果，即係表示冇懷孕，咁樣就唔需要擔心。同埋驗孕棒結果都係主要睇驗孕後十幾分鐘嘅情況，因為隔得太耐，例如你隔咗兩日咁，就好可能會受其他因素影響而破壞結果，到時個結果都唔可信。如果真係對於驗孕棒嘅指示有懷疑，建議可以去查詢婦科診所，進一步核實結果
今日都已經用咗電子驗孕棒啦，結果都係not pregnant ，但係我就冇用到晨尿
咁個結果都算準確？
結果係準確，所以已經可以確定你係冇懷孕風險。