你好 星期六(9/8) 朝早用過clearblue驗孕棒check只有1條線 過幾個鐘之後睇出左好淺好少嘅第2條線 下午再用另一牌子再check 都係1條線 諗住應該無事
但係今早(11/8) 用clearblue電子驗孕棒check到係顯示pregnant 1-2weeks
之後用返clearblue普通驗孕棒顯示係1條線 請問係真係中左嗎？ 應該點算好 因為無準備會有
唔該
Hello你好啊～首先都想問返你最後一次發生性行為係幾多號？最快喺性行為之後嘅7日後就可有一個初步結果，而11日後就會有一個準確嘅結果。電子驗孕棒比普通驗孕棒嘅準確度高，你可以喺第11日嘅時候再驗多次，就可以確定結果。
我26/7，2/8，9/8都有發生過性行為
Hello, 多謝你願意分享同正視呢個情況! 你主動去驗孕，仲用咗唔同方法去確認，咁樣好正確，值得讚賞! 知道你而家好擔心。
驗孕棒原理係檢測hCG荷爾蒙嚟判斷是否懷孕。電子驗孕棒較普通驗孕棒，靈敏度較高。驗孕結果唔一致其中一個原因係「蒸發線」問題，普通驗孕棒放耐咗幾個鐘後可能會出現好淺嘅第二條線，但呢個唔算準確結果；或者hCG濃度未夠高導致普通驗孕棒顯示「一條線」。
建議你再驗多次，如果再用電子驗孕棒仍然顯示Pregnant，懷孕機會好高。如果普通驗孕棒連續兩日都出現明顯第二條線，都係陽性反應。或者去診所或家計會驗血，血液hCG測試可以更早、更準確咁確認係咪懷孕。如果真係懷孕，醫生可以同你講下一步選擇。
發現懷孕後，你可以考慮以下幾個方向：
A. 如果決定繼續懷孕，可以到母嬰健康院登記產前檢查，政府提供免費基本產檢。私家醫院提供更全面嘅產檢套餐，但費用較高。
B. 如果終止懷孕，根據香港法例規定，終止懷孕必須符合以下兩個合法條件之一，並由兩位註冊醫生確認：
- 繼續懷孕會對孕婦嘅生命或身心健康造成嚴重風險（例如：未成年、受性侵懷孕、精神健康問題等）。
- 胎兒出生後極可能嚴重殘疾。
最理想嘅終止懷孕週數係12週前，方法有藥物終止懷孕，服用藥物使胚胎排出，類似經期，但需多次覆診確保完全流產，或手術終止懷孕局部或監測麻醉下進行，詳情需向醫生了解。
家計會有提供終止懷孕服務，要注意18歲以下需家長同意，18歲以上可自行決定（家計會不會主動通知家長）。
C. 考慮領養或其他支援，如果唔想終止懷孕但又未能照顧BB，可聯絡香港明愛、母親的抉擇等機構，提供產前支援及領養安排。
建議你盡快預約醫生或家計會（電話：2572 2222），確認懷孕狀況及討論可行方案。 如果感到焦慮或壓力，可尋求輔導（家計會提供相關服務）。 避免再次意外懷孕，可到家計會諮詢長期避孕方法（如避孕套、避孕藥、子宮環、避孕針等）。
知道你而家可能好驚同迷茫，但記住你唔係一個人! 無論結果係點，都可以搵信任嘅人傾吓，或者去家計會問專業意見。你肯正視問題，已經好勇敢!
無論你嘅決定係咩，都應該尊重自己嘅選擇，並尋求專業醫療意見。如果有更多疑問，歡迎再問!
你好呀 我之後11/8當日黃昏去左家計會驗孕都係一條線 姑娘話無 叫我2星期後再驗
而我12/8&13/8朝早各用左2個唔同牌子嘅驗孕棒都係一條線 我係咪應該用電子驗孕棒再驗多次？
定等2星期後先再驗？ 每一日都好煎熬好驚 日日都想驗
對上要次嚟m係3/7 經期唔太準 3X日左右
如果你平時週期都唔太準，相信你今次都好大機會係，因為週期唔准而影響經期遲嚟。不過見你提及喺8月9號有進行過性行為，如果你想確認喺呢一次嘅性行為後，有冇懷孕風險，建議你喺7日之後，甚至喺11日之後再進行多一次自行驗孕，如果結果係陰性，就應該冇任何嘅懷孕風險。
你好呀 因為我太擔心，所以我12/8-16/8每日都有用驗孕棒check 晨尿，全部都係1條線，其中15/8有用電子check係not pregnant，心都淡定啲 諗應該無事的。
點知今朝(17/8)用cb check係1條線 之後再用電子check又出返pregnant 1-2 wks 再用第二枝又出左not pregnant 點解會咁嘅 而且仲未嚟m
Hello~ 驗孕棒係透過檢測尿液中嘅hCG (人絨毛膜促性腺激素)含量，呢款激素會係受精卵著床後開始大量分泌，而一般受精著床呢個過程需要6-9日，所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確～
見到你話你7月26號、8月2號、8月9號都有發生性行為，即係話今朝驗嘅時候，距離你最近一次性行為啱啱係7日多少少，因此有可能係：7月26號、8月2號嘅性行為冇造成懷孕，但係8月9號果次有，而因為啱啱hcG 水平嚟到能夠有初步結果嘅邊緣，所以出現2種結果。如果係呢個情況，你嚟緊再驗嘅時候會慢慢能夠獲得更準確嘅結果～
當然亦都有可能係未有跟足說明書使用驗孕棒，導致結果唔準確嘅～
所以呢一刻能夠做嘅就係等去到性行為後11日再覆檢喇～
另外都想問你最近呢幾次嘅性接觸有冇使用安全措施呀？
我哋都可以根據呢嘅互動做返簡單風險評估，等個心無咁緊張~~
你好呀，每次發生性行為都有全程戴套同埋事後有裝水檢查有冇穿㗎，但係唔知點解都會咁樣
而我對上一次嚟m係3/7，因為唔太準，今年試過最耐38日先嚟，用38日計應該10/8，但係仲未嚟，已經遲左8日
比電子棒搞到好亂，11/8驗到過pregnant 1-2 wks，15/8 not pregnant，17/8 pregnant 1-2 wks 同not pregnant 都有
，但係我用試紙嘅全部都係出1條線
個人好緊張狀態 成日係到諗 m又唔嚟
Hello你好呀～我哋都好明白有唔同嘅測試結果，會導致你不知所措，更加緊張。見到你12-16號都係用晨尿去驗孕，晨尿嘅hCG含量會比較高，結果都係一條線，相信結果都比較準確。見你11號有去過家計會驗孕，而結果係陰性，姑娘都建議兩星期後可以再去驗多次，而最後一次發生性行為係9號，喺而家呢個階段，相信等到大約24-25號在驗孕嘅結果就最準確。
都知道經期有延遲係會令人好擔心，但係壓力都係令經期延遲嘅一個好大嘅主因，明白你嘅擔心，但呢個情況真係要再觀察。
知道 多謝你地願意聽我嘅煩惱
今日有流啡紅血同分泌物，唔知係就快嚟m定點
Hello, 今日嘅啡紅血可能係月經開始不過需要進一步觀察。如果係月經，通常會由啡色變紅同增加流量；如果係著床出血，通常好少量同1-2日停。
唔使每日驗，因為每日驗會增加心理壓力，仲可能因為hCG濃度低而影響結果。喺8/25或8/27再驗孕，或者去家計會/公立醫院做血液hCG檢查以確認是否懷孕。
你好呀
我25/8已經無哂出血 26/8去左家計會驗孕 結果都係一條線嘅 我有同姑娘講過幾次用電子驗到1-2weeks 同疑似黎m情況 佢話電子太敏感 好多時初期未穩都會驗到 用返線個啲會好啲 佢話初初可能真係有，但係之後隨着月經排出 所以驗到一條線
不過佢都係建議2星期後再去驗 結果就最準
聽完姑娘講有安心少少咁即係應該已經無懷孕
但係今朝忍唔住又用電子驗 都係1-2weeks
唔知係咪因為hcg未降低哂 所以顯示呢個結果
又再囉囉攣
相信家計會驗既結果都準確，你唔好太擔心同緊張，你宜家放鬆啲，暫時唔好再驗住，聽姑娘講兩星期後再驗，結果係一線就肯肯定無懷孕，唔使再驗啦。
你好呀，上次26/8去完家計會後， 10/9我自己用曼xxx驗孕棒驗晨尿係一條線，然後因為我仲有一盒電子驗孕棒 所以今天12/9用晨尿驗用埋 結果都係pregnant 1-2 weeks 
電郵個結抵埋唔理佢好
咁樣其實我差唔多成個月時間都係驗到1-2 weeks 會唔會身體有啲咩事 係唔係搵醫生檢查一下比較好 唔該
Hello 相信你一定係覺得好擔心好緊張好奇怪。根據之前一系列嘅情況，你身體都唔似係有懷孕。
至於身體會唔會有事都好難單憑咁樣就斷定得到，當然如果有任何懷疑或者擔心嘅話，搵醫生做身體檢查一定會係最好嘅做法。
但係呢個情況都有機會會係支電子驗孕棒本身有問題而導致，有時可能係驗孕棒本身質素唔好，或者存放方式都可能會影響到驗孕棒，所以都唔一定係關你身體事嘅。
希望幫到你
想問下 你用 地下體性接觸時已經有用安全套嗎？
射完有立刻拔出嗎？
正常應該冇咩問顯， 唔知係米電子野出錯
最後你有睇醫生嗎？