同男朋友long d，15/10-26/10去咗外地探佢，幾乎每日都有性行為。之前已經冇性行為1年多少少
有幾次佢有用性玩具去刺激陰蒂，本身都係第一次用，開始時冇乜大問題，但有一次覺得震感好大好唔舒服，之後小便就開始出現奇怪嘅感覺。首先係小便排清個一刻會有種好尿急嘅感覺，小便完冇耐又會覺得好急，但再去又去唔到好多，情況都持續咗一星期左右。睇過會唔會係尿道炎，但又唔太似。
懷孕會有尿頻嘅徴狀，但會唔會咁快就有懷孕徵狀（同第一次性行為相隔17日）？我而家驗孕係咪都唔太準確，要等26/10之後嘅11日驗會更好？因為本身黎經都好唔準，係好煎熬嘅等待…
另外小便嘅情況我應唔應該要諮詢醫生？我唔太知道應該點處理呢件事… 謝謝你
Hello～如果使用性玩具後身體感覺尿意但無尿液嘅話，有機會係玩具力度太大，導致陰蒂嘅神經被過分刺激，暫停用玩具後症狀應該會慢慢消失；另一個可能性係性行為前後性器官冇清潔乾淨，或者玩具冇適當地消毒，令細菌入侵，因而出現膀胱炎或者泌尿道感染嘅情況。可以嘗試補充返多啲水份，透過水份將細菌排走，從而減輕症狀。
另外都想了解返性行為嘅時候有冇使用安全措施（例如係安全套或避孕藥）？如果完全冇使用安全措施嘅話，感染同懷孕嘅風險都會增加。假如想確認自己有無懷孕，可以用驗孕棒根據說明書驗孕，一般受精著床呢個過程需要6-9日，所以係性行為後7日使用驗孕棒的話會有初步嘅結果，11日就會有更準確嘅結果。所以26號係最後一次性行為的話，想比較肯定嘅話都可以相隔11日後再驗，會係較準確嘅結果。
多謝你嘅回覆
我哋咁多日都有用安全套，伴侶每次性行為後都有檢查，安全套都冇穿到。性行為期間，未戴套之前我都盡量避開佢嘅性器官，可能有一兩次少少precum掂到係陰蒂位置，但唔知會唔會有時唔覺意掂到陰部，而自己又冇意識到….
我都仲係好擔心。經期本身28-40日會嚟一次，上次月經係10月3日，即係呢段期間好大機會係排卵期。今日月經都未嚟，所以真係好驚…今朝小便時仲抹到紅紅地嘅分泌物，呢一兩日都係好疲倦同小腹脹，好驚係著床出血同出咗事嘅先兆
以前有食開避孕藥，但身體問題响醫生建議下最後停咗藥，但只用安全套做物理性保護都覺得好擔心，明明係一件享受嘅事又要步步為營，事後仲要係咁驚有冇啲唔小心嘅地方。。。
何時呢度啲staff變左驗孕棒
50蚊都唔肯跌
可悲
多謝你嘅回覆
其實我都心急，响2/11同3/11分別驗過都係陰性，不過因為只隔咗8日，仲未到建議時間嘅11日，所以心情都好忐忑，想搵個渠道抒發不安。我已經買定多兩枝唔同牌子嘅驗孕棒，到咗建議時間會再驗。我明白要為自己負責任同用行動處理問題~
自知對關於性嘅事情有少少焦慮，同時覺得唔係逃避就解決到嘅事，見到有呢個平台，都想聽下專業admin們嘅意見～睇其他post覺得幫到好多
Hello～聽你嘅描述，你哋每一次發生性行為都有使用安全套，而且安全套冇穿到，相信都係一個成功嘅安全措施，明白你可能會擔心precum接觸到陰部而造成懷孕，其實只要冇直接接觸到陰道，風險都比較低。
有粉紅色嘅分泌物、身體感到好疲倦同小腹脹痛，其實都係經前嘅先兆，睇返日期都好接近你下一次嘅經期，有時候太過擔心同壓力都會影響經期，如果真係好擔心嘅，性行為7日嘅驗孕初步結果都可以做一個參考，希望可以釋除你嘅擔憂。
明白懷孕真係一個好令人擔心嘅事，但係你喺安全措施上邊已經做得好好㗎啦，唔需要太擔心。