想問如果我想追一個crush，可以同佢傾咩話題，或者有咩可以做？
Hello～ 觀察入微，自然客易開啟話題，可以先細心觀察對方，譬如對方書包掛住Chiikawa，可以同佢傾吓劇情；另外都可以從共同興趣或者話題入手，譬如了解對方平時鍾意做咩/鍾意睇咩劇/鍾意聽咩類型嘅音樂等等，你都可以分享自己嘅喜好，令大家都對雙方有了解。當然都要尊重對方有冇分享嘅意欲，如果唔太願意嘅話就避免再追問，留返空間比對方。
當建立到比較友好嘅關係，可以嘗試約對方做大家都有興趣嘅事，例如對方鍾意睇書，可以約對方去書店，或者買本佢鍾意嘅書做禮物，視乎邊種活動令你感到自在，同時給予到對方支持。
關係入面，最重要嘅係聆聽對方嘅需求同埋留意返自己界線，如果對方對你嘅邀請冇興趣的話，都建議尊重返對方，避免強人所難；另一方面避免過分投其所好，如果對方同你興趣完全唔同，你喺希望追求到對方嘅情況下，強迫自己做唔想做嘅事，咁樣都未必建立到一段健康嘅關係。
每個人都係獨一無二，喜歡同唔喜歡嘅嘢都會唔一樣，與其迎合對方喜好，不如嘗試真誠地表達好奇，循序漸進慢慢建立關係，即使最終唔適合，尊重對方嘅選擇，都可以維持返良好嘅友好關係。