我係琴日星期四早上，同男朋友去左時鐘酒店，我哋諗住買ky點知店家就話賣晒，之後佢就借咗一支開封仲剩一半嘅ky俾我哋，我本來拒絕咗，但最後都係用咗，而用完之後，我就非常擔心會唔會感染性病。個枝ky外表睇落入面啲液體透明有少少氣泡，而樽身睇落冇任何破損。求解答…因為我已經喺大陸買咗啲驗嘅試紙，但人哋話建議一個月後再試，而家就非常擔心。
唔好意思，我想補充少少，就係我地有帶套，而之前我膝頭受傷，不過啲血已經冇流。
Hello 明白你一定好擔心，我簡單回應吓先。
性病方面，風險相對比較低。不過就始終都唔係咁衛生，所以都唔建議下次再咁做。
咁呢度詳細解釋吓。
一般嚟講大部份性病都好倚靠體液傳播，或者接觸到傷口/破損組織等等。大部份性病好多時都會喺離開身體，離開體液，接觸到空氣之後好快就存活唔到。所以例如如果嗰支潤滑劑係一個有性病嘅人用過，而佢又將自己嘅體液掂過喺潤滑劑出口位，然後你馬上即時使用，咁就有機會會傳播到性病。但如果唔係人地用完，然後你地馬上即時使用，或者上一手冇性病嘅話，咁傳播性病嘅機會都比較低。
不過，即使性病風險較低都好，其他人用過嘅潤滑劑始終都可能會藏有其他細菌，尤其是唔知道呢支潤滑劑係擺咗幾耐，唔知道經過幾多手，來歷不明，亦都唔知道上一手用過嘅人係點樣處理，有機會會有其他細菌，一來唔係咁衛生，二來都有機會會造成其他細菌感染，所以都唔係咁建議下次再咁做。
至於如果擔心身體想驗一驗嘅話，都的確係需要一段時間先係比較準確嘅，所以一個月可以驗一驗。如果想更準確，都可以喺三個月之後做個全面嘅檢查，亦都可以去衛生署嘅社會衛生科，可以免費Walk in做個全面性病檢查。
呢段時間都可以吓留意吓自己身體有冇任何嘅唔舒服，尤其是性器官會唔會有痕癢或者痛楚，或者有冇任何異味，有冇任何奇怪嘅分泌物等等，呢啲都係細菌感染或者其他性病可能有嘅病徵。
希望幫到你。