唔好意思，比較多問題想問下，希望得到解答。。。
男生著住底褲，女生咩都無著，如果性器官掂到，會唔會有機會懷孕？
男女都係第一次，有戴套，想嘗試插入，但只係入到陰道口多dd，跟住就插唔入，在陰道口同周圍磨擦，會唔會有機會懷孕？
安全套點先係岩size？ 戴完男生覺得ok，但望落覺得有d緊。
戴安全套時應該都係硬左先會插得入？
事前有洗手，放到一隻手指入去陰道，係咪可以stay係入面一段時間？ 有咩要留意？
想再放多一隻手指但一試就好痛，係咪唔岩位？
女生事後係咪去廁所同用清水洗下下面就ok？ 洗唔洗用沖涼液？
Hello 第一次發生性行為，有好多唔明白嘅地方都係正常嘅。
就咁睇你呢個情況懷孕風險都非常低，唔使太擔心。通常要有懷孕風險，都係精子同陰道有直接接觸，例如陰莖冇用任何安全措施下直接插入，令到精液或者尿道球腺液或者精子有機會留喺陰道入邊，就可能會有懷孕風險。
而你地嘅情況，因為都冇直接接觸，例如可能係着住底褲，或者有用到安全套，所以懷孕風險都唔高，唔使太擔心。
至於安全套係有分唔同size嘅，唔同地方嘅牌子會有唔同嘅計法，不過主要都係以充血嘅陰莖圓周，除2（主要係歐美及香港品牌），或者除3.14（主要係日本品牌）去計算，可以自己喺屋企度咗先，之後再去選購合適size嘅安全套。詳細可以參考我哋嘅IG post：安全套尺寸點量度？- 糖不甩
如果覺得太緊或者太鬆，可能就係size唔啱，需要買過另一個合適嘅size啦。至於戴安全套，的確係應該以硬咗性興奮嘅陰莖戴嘅。
至於指交，事前有洗手再放入去，的確做得非常好，會比較衛生，避免細菌感染，係一個好好嘅習慣，如果每次都做呢個習慣就更加好啦。至於係咪stay喺陰道入面一段時間，就視乎你哋自己嘅愉悅程度，或者性行為習慣，都係每個人喜好唔同。如果講到有咩要注意嘅話，就可能係要注意吓指甲會唔會太長，可能唔小心刮傷陰道。
如果想再放多隻手指入去但好痛，除咗可能係因為唔啱位，都有可能係因為陰道肌肉太緊。陰道肌肉太緊，係好多人都有嘅情況，非常常見，並唔係有咩問題。因為如果從來冇發生過性行為，或者從來冇任何東西插入過陰道入邊，陰道本身都有機會係好緊嘅，並未習慣有任何外物插入，所以可能係太緊張而令肌肉未放鬆到，或者係本身陰道肌肉就係咁緊致。
其中一個方法係嘗試性行為時做多啲前戲，愛撫下其他身體部位，放鬆心情，令肌肉放鬆。或者可以多啲嘗試慢慢用手指慢慢插入，令陰道習慣張弛度。
至於發生性行為之後，最好嘅可以去一去小便，或者用清水清潔就可以啦，只要令到陰部清潔乾淨，冇任何殘留嘅話，就可以㗎啦，都唔使專登用沖涼液。
希望幫助到你哋。