每星期都會有一日係健身室操腳，
操完腳之後第二日瞓醒對腳好酸，
但testosterone提高左就好想打飛機，
永遠頂唔順要打一次，
呢個操完腳性慾強既現象屬於正常？
啲人話清槍會影響肌肉生長？
Halo 唔好意思 遲咗少少覆你
周不時都聽人講操腳後會性慾大咗
其實都係有可能嘅，雖然每人嘅身體同埋體質都會有啲唔同。但正如你都有提到，部份運動的確會刺激睪酮分泌，從而令人嘅性慾有所影響，部份人因此會喺運動後更有性慾。所以健身後（特別操腳）你嘅性慾可能相對比較強都係合理嘅。
至於自慰會唔會令到肌肉生長有所影響，呢個問題暫時就未有科學根據嘅。一般而言，喺自慰或者係性行為後，男性可能會因此出現短時間嘅疲累，而相對肌肉可能會暫時會冇咁有力，但正常嚟講呢個情況只係短時間，而且唔會對身體有長遠嘅影響。所以如果你喺性行為後即刻做運動，當日做運動嘅表現相對可能會受到影響；但只係運動表現，而唔係長遠嘅問題，正常嚟講，亦唔會影響你嘅肌肉生長，所以並唔需要擔心。而按照你所講，喺運動後先自慰，相信影響更加唔大嘅！
最後，每個人嘅性需要、習慣同能力都有唔同嘅；一般而言，只要唔影響日常生活嘅話，適量嘅自慰係無任何問題。當然，如果因為自慰而有唔舒服嘅情況，咁就要考慮停一停啦。