2/11開始食yaz，應該係月經後一個星期有多。
19/11有月經，但係出血量好少，全部都係啡色分泌物，維持左3日左右。
我照舊食夠21粒先停，4日後再開第二盒食，結果13/12突然又有月經，今次就同平時m到差唔多，5-6日左右。
我都係繼續食夠21粒先停，結果27/12又黎多次月經。
今次我停左，直接係月經第五日開始食返藥。
然後10/1又突然m到，維持到今日都仲有啲啲血。
想問我應該食夠21日先停，定係依家就應該要停？
咁樣係正常？我下次食藥應該幾時食？
Halo
想了解下你本身服用事前避孕藥前，有冇經過任何醫護人員嘅檢查同埋有無係佢地嘅指引下服用？同埋你仲有無其他身體上嘅唔舒服？
一般嚟講，喺初期服用事前避孕藥嘅時候，每個人嘅副作用都會有啲唔同，所以有機會可能會令到你嘅經期混亂。但呢個情況理應唔會超過三個月嘅，而我見你都係啱啱開始食咗兩個月，所以，你可以先如常服用並留意吓嚟緊呢個月嘅月經如何。例如有冇穩定嘅經期，是否停藥期間先嚟月經等。而如果情況仍然唔理想嘅，我建議你可以帶埋食緊嘅藥返去複診，先了解吓依家嘅情況，睇下仲適唔適合繼續服用現有嘅避孕藥，或是可能要換過另一款避孕藥。
但如果你本身第一次食藥已經係自己直接喺藥房或者其他零售舖購買嘅話，而未有諮詢醫護人員意見，又或者你仲有其他身體上嘅不適；咁我建議你可以先去家計會睇醫生，睇吓自己係咪真係適合使用事前避孕藥，或者睇吓會唔會會有其他牌子嘅避孕藥更加合適，以免有其他意外。