話説我哋第一次一齊去旅行，周圍去食嘢，好開心
夜晚返到酒店嘅時候，因為行咗成日好攰，所以沖完涼就瞓
我凍到打晒冷震，佢主動問我，可唔可以俾佢攬住我，佢應該feel到我猶疑，之後就講咗句「或者我問staff攞多張被？」
（陣間會講點解猶疑）
我就話驚麻煩到人哋，跟住移向佢嗰邊少少，示意我願意攬住瞓
我當時睡姿係背向住佢，打側瞓，手彎曲擺前面
結果佢竟然拖住我隻手瞓
佢問我係咪平時都咁凍，我話可能因為病病地，唔知佢係咪擔心我會惡化，所以攬得肉緊咗，希望我暖啲
我哋嗰陣係貼住晒，即係我背脊係挨住佢
紅都面晒，我超緊張，好怕醜，未試過咁近距離
但佢真係超守規矩，淨係攬實我，連借啲意搏懵掂下我心口都冇
過咗幾個字，我突然喊
（因為諗返起以前，下面會講）
佢即刻超緊張問我傻豬做乜嘢啊
我答佢話覺得自己好幸福所以感動到喊
今次我揾到個真係尊重我嘅男仔，其實平時相處都feel到，所以我先至唔驚同佢去旅行
開始講以前嘅事
因為我上一個男朋友係成日都問我可唔可以同佢做，但嗰陣只係一齊咗幾個禮拜
我拒絕咗幾次，佢都係繼續提出要求，問就算唔畀插嘅話可唔可以口交/手交/乳交/腳交
我都係冇應承
有時仲要失驚無神就揸我，仲要係好粗魯嗰種，真係會整痛
我嗰陣都仲未識反抗
有一次佢話想去遊車河，試下一齊睇日出，我就揸車同佢去啦
結果落咗車之後，佢趁周圍都好靜嘅時候就夾硬摸我，喺唔情願嘅情況下冇咗初吻
我好辛苦先至推開到佢，本身諗住出腳，但最尾都係冇踢到佢
佢鬧我，邊有女人會唔滿足另一半，都唔知我點做人女朋友，含又唔肯，幫佢打又唔肯
我好驚，唔知佢會做啲咩，即刻跑返上車自己走咗
跟住過咗大半日佢send訊息嚟同我講對唔住，話自己飲咗酒
我就完全唔畀面，同佢講既然咁唔滿意嘅話咪揾個滿足到佢嘅人囉
諗返起都唔應該，都唔知佢係咪嗰啲XX即飛嘅人
跟住我就有陰影，成一年冇同男仔出過街
幾個月之前先至遇到而家呢個男朋友，我冇同佢講過呢件事/仲未鼓起到勇氣同佢講，所以佢應該真係發自內心攬住我瞓咗成晚
至於有反應，我真係完全唔介意，我知唔係靠自己意識控制得到
攬得實，兩個人又黐得埋，會硬我係理解
甚至可能只係因為佢聞到香味
但正正係佢嘅以禮相待，我對佢嘅信任提升咗好多
因為未去旅行之前，我哋甚至好少拖手，就算拖都係勾住手指尾嗰種，所以可能導致佢覺得我抗拒身體接觸，that’s why就算我好明顯係好凍佢都要問咗我先
去完旅行返嚟，我而家係會蹺住佢隻手行
呢個係我第二個男朋友，唔知會唔會係最後一個
嗰晚瞓醒之後第二日佢問我使唔使休息，我就話難得去旅行，唔想嘥咗，佢幫我著到成隻糉
跟住仲偷偷地去咗買藥畀我
返到酒店食完藥眼瞓好快就瞓着，但隱約feel到佢摸下我額頭，驚我發燒
再下一日我起身去沖涼，都係佢幫我吹頭
嘩
唔經唔覺原來我都打咗咁多嘢，講多少少就算喇
前幾日我哋又有機會一齊瞓，我主動同佢講鍾意佢攬住我瞓，但今次好多睡姿
面向佢又有，背向佢都有，甚至係我攬佢
不過我都儘量唔郁太大幅度，避免patpat或者其他地方撞向佢造成額外刺激
可能下次去旅行又會有新嘅故事，最緊要係希望大家都身體健康
本身只係諗住講第一次旅行
點知越講越多嘢
好多謝有耐性睇晒嘅你（哋）
糖不甩係個好好嘅platform