Hello，我琴晚share咗自己同男朋友第一次去旅行
估唔到今日喺機緣巧合之下佢都share咗佢嘅轉變
我都係今日先至咁深入了解到佢
話説我今日去接男朋友放工（準備咗surprise），揸揸下車嘅時候我又突然提起，我問佢仲記唔記得我哋第一次一齊去旅行，佢話記得啊十一月七號吖嘛，仲好陰公病咗添
佢最深刻嘅係我講嘅一句説話，就係幸福所以感動到喊嗰句
跟住突然就deep talk模式
我話等陣先，泊好車先講
佢話未識我之前其實佢真係冇諗過自己而家會拍到拖
我問佢，出街嘅時候如果見到人哋好sweet唔會羨慕咩
佢就話只係因為人哋嗌交嘅時候我哋見唔到啫，如果真係好和諧好融洽嘅，呢啲就真係好有緣份
所以佢都唔會話一定覺得自己孤獨終老嘅，咪等下囉，只不過唔知等幾耐，可能等下等下就一世
但我覺得佢唔係情緒化嘅抱怨，佢都有理性嘅一面
佢話佢上一個女朋友就係成日亂發脾氣，但佢都覺得係自己嘅問題，係自己做得唔夠好，所以對方先至會發脾氣
佢話唔係人嘅問題，而係拍拖本身就係要氹人，只不過佢覺得成日都要氹好煩，又唔知對方點樣先至滿意，所以就算換咩人拍拖都一樣，最尾就覺得係自己唔適合拍拖，唔係唔相信愛情，係唔相信自己
聽完佢講，我就話你而家咪遇到我囉
佢冇出聲幾秒，跟住突然除咗安全帶（掛住講嘢一直都冇除），原來係想攬住我，佢話好多謝我出現喺佢嘅生命入面，同我一樣覺得自己好幸福
我都打開雙手攬返佢，終於鼓起勇氣同佢講「你同我講咗咁多，我都有嘢想同你講，不過你聽完唔準嬲㗎」
跟住就同佢講返以前嘅嘢
佢聽完之後鬆開手，去返自己個位，原來係揾紙巾畀我，佢話聽到我把聲有啲震，sense到我想喊
我一路都眼濕濕，終於忍唔住，喊住問佢會唔會覺得我污糟
而且唔帶眼識人
佢一路幫我抹眼淚一路安慰我「每個人都有過去，你願意同我分享已經好叻女㗎喇」
佢叫我唔使怪自己，仲話收埋喺心入面咁耐一定好辛苦
問我肚餓未，見到我咁唔開心，使唔使調轉位畀佢揸車，仲話要帶我去食甜品
啱啱先至忍唔住喊
呢個moment就忍唔住笑，一嚟係feel到佢真係好care我，二嚟係覺得佢好可愛，我嗲佢「唔制，我要自己揸返，同埋我今日有個特別嘅plan，你估下係乜嘢」
個surprise就係我book咗檯同佢食大餐
唔止我了解多咗佢，佢都係，兩個都互相認識多咗大家
我哋一齊咗差唔多一年，真係冇咩嗌過交
佢上一次拍拖只係幾個禮拜就已經頂唔順想分手，但因為一啲因素搞到拖咗好耐先至分到
我哋去咗兩次旅行，一齊喺同一個空間相處咗十幾日，都唔需要特登掩飾自己，做返平時喺屋企嘅自己就得，而且當時仲要係未咁熟悉彼此
車佢返屋企嘅時候我好隨意問咗佢一句，成大半年都仲淨係得攬攬錫錫唔會介意㗎咩
其實連錫都好少，最多都係錫下額頭或者錫下面，因為我仲好努力克服緊嘴對嘴嘅時候自己唔去諗返起
錫下面？
錫下 面（䏭墩）
佢話唔急，仲安慰我話唔使有壓力，會一直陪住我
講講下突然同我講對唔住，話佢冇意識到我抗拒kiss
我都即刻同佢講返其實之前去完旅行之後我對住佢已經放鬆咗好多，冇再咁拘謹，而且係我自己冇同佢提起過以前嘅經歷
最後車到佢返去嗰陣我哋好似兩個傻傻地喺度互相多謝大家坦誠溝通
都唔知話係幼稚定成熟好
好想係度比啲肯定你，你絕對唔係前段提到嘅「污糟」，而且呢件事都唔會係你嘅錯呀