我服用短效純孕激素避孕藥「去氧孕烯（Desogestrel）minipills已經規律食咗五個月，每日定時晚上十點食一粒。我喺尋日和今日有過兩次無套性交，有射精入體內。
今晚10點食完藥後11:30肚痾，連續屙兩次第二次屙水，已經食咗止痾藥。想知道有冇話最耐可以幾時補食藥？如果等一/兩個鐘知道冇再肚痛後補食可以嗎？因為驚之後補完又再屙都係會冇藥效。
同埋琴日同今日有無保護性行為兼內射，藥丸吸收受影響，補食受孕風險會唔會好大？
去氧孕烯係僅含黃體酮嘅口服避孕藥，一般避孕藥都需要兩到三個鐘時間吸收，如果10點食完藥，及後11:30肚痾，藥物好大可能已經被排出，你可以等一到兩個鐘，等身體穩定再食藥，但最遲需要喺12小時之內再補服去維持藥效。如果呢段時間入面，身體依然有屙嘔情況出現嘅話，建議可以諮詢醫生，了解需唔需要食緊急避孕藥。
雖然本身已經連續服食咗五個月嘅避孕藥，藥效喺身體入面已經達至穩定水平，但穩陣起見，跟住落嚟7日假如發生性行為嘅話，都建議採用額外嘅安全措施（例如避孕套）降低懷孕風險。