第一次上呢個討論區，有D野想問好耐，唔知有冇人可以幫到我，自已初戀 未來第一次想同男朋友sex 約左下星期去佢屋企 但自已呢個星期都好緊張，好怕自已做唔好，因為知道對方有經驗，以住女朋友身材都好好，同埋自已又怕到時唔知點做好，怕佢唔舒服，想知道第一次要準備D咩，要唔要剃毛？有咩要帶定，套要自已準備定到時男仔會自已準備好，同埋會唔會好痛？通常幾耐就會完，同埋就算用左套都好，食事後係咪會安全d，始終好似有保障甘，同埋如果要提高自已技巧可以點樣學識，問題有點多，不好意思
Hello 完全明白第一次可能會好緊張，係好正常嘅事嚟嘅，好多人都可能有你呢種煩惱，不過未必夠膽問，或者唔知去邊問，喺呢度你有咩都可以隨便問
首先，任何人都有第一次，唔知點做係正常嘅，睇得出你擔心自己會比下去，不過你嘅伴侶選擇咗你就代表佢愛嘅係你，相信佢知道你係第一次，都會明白你可能會不知所措。
我嘗試回應你所問嘅嘢先。
喺剃毛方面，每個人都有自己嘅喜好，有人鍾意有好多體毛，亦都有啲人會鍾意少啲，而你亦都可以有自己嘅諗法，所以都未必需要特別諗修剪與否。不過如果擔心嘅話，都可以考慮出發前好好清潔，保持乾淨就已經足夠。
至於安全套方面，如果唔清楚嘅話，都可以嘗試早啲旁敲側擊問清楚對方有冇準備，或者對方屋企本身有冇，因為其實安全套都有唔同size嘅，如果由你伴侶自己準備就會更加好。不過你擔心嘅話都可以自己帶定去，咁就可以更放心。
至於第一次會唔會好痛，就每個人都唔同嘅，不過第一次的確比較容易更加痛，亦都可能因為插入陰道時令陰道冠撕裂而會有出血情況（陰道冠亦即係俗稱嘅處女膜）
而且第一次發生通常都未必咁容易插入陰道，因為陰道肌肉從來冇任何外物插入過，未必咁容易即刻第一次馬上就插到入去，再加上第一次通常比較緊張，當太緊張就可能會令陰道肌肉收緊，或者陰道潤滑不足，都可能更加難插入。
如果呢件事真係發生咗嘅話，都可以考慮增加前戲，例如多啲攬攬錫錫或者撫摸身體其他地方，令身體同埋心情更加放鬆，或者到時可以考慮增加潤滑劑，都會幫助到。
而且，都要記住性行為唔一定要包括插入陰道，最終都唔一定要插入陰道為結束，如果真係唔得嘅話，或者真係發生嘅時候發覺自己唔想要，都唔需要勉強插入陰道，因為性行為都有好多唔同方式，包括口交、手交等等，所以都可以考慮以其他唔同方式進行，都一樣可以滿足大家。
至於性行為時間幾耐，同樣因人而異，亦都好視乎牽涉啲咩形式，有冇好長嘅前戲等等，快嘅可能5分鐘內，長嘅可能半個鐘至一個鐘都有可能，甚至更長。
至於事後藥，如果你哋都確保呢次發生性行為係安全嘅話，就唔建議再食事後藥，因為始終事後藥係高劑量嘅荷爾蒙藥物，食咗對身體影響都比較大，通常只係當咗緊急手段，一個月最多食一次，唔適宜當係普通藥咁食。如果你哋有正確使用安全套，整個性行為之中陰莖冇直接接觸陰道，冇精子精液接觸陰道嘅話，基本上成效都好高，唔需要特別食事後藥。
除非避孕措施失效，或者有其他風險出現咗，就可能要考慮食事後藥，而且要食嘅話都要睇完醫生，並係性行為之後72小時或者120小時內食到。
至於提高技巧，都可以考慮上網搵吓有冇可靠嘅資訊，可以睇吓有冇幫助，不過始終唔係所有資訊都正確，亦都唔係所有資訊都適用於你身上或者每段關係上，呢個就需要自己判斷。不過其實好多人喺性行為上都唔係專家，所以唔使太擔心自己嘅表現，因為其實好多人嘅表現其實都唔會話非常突出㗎咋，某程度上大家都係「一邊做一邊學」
最後提醒返，即使係去對方屋企，都未必一定會發生，或者一定要發生性行為嘅。如果最後冇發生到，或者到真係發生嘅時候，你覺得唔舒服或者唔想發生嘅話，都絕對有權去拒絕對方，唔需要強迫自己滿足對方，可以同對方講返清楚你嘅感受。
回覆有點多，但你有咩疑慮都可以再問，或者到時事後完咗有咩憂慮都可以返嚟討論區問。
希望幫到你 