敏感嘅感官

[KokoK0K0]

早排我哋慶祝生日，特等揀咗放假之前嗰晚，即係收工去撐檯腳
又book餐廳又book酒店

我同佢講話想飲酒，佢都話想飲
其實蠢咗，早知唔應該揸車
不過反而有意外嘅收穫
總之最後淨係得我飲，架車畀咗佢揸

嗰日係第一次喺佢面前飲酒，所以佢唔知我易唔易醉
呢個時候我戲精上身扮飲醉，但其實好清醒

唔係想測試咩人性
一直以嚟嘅相處都令我覺得佢唔會乘人之危

去到酒店，沖完涼之後我就話好眼瞓，佢就即刻放低電話，氹我瞓，當我係小朋友

有咩意外收穫呢
就係
佢應該真係覺得我飲醉，所以過咗幾分鐘，佢以為我瞓著咗，就講咗啲平時唔好意思講嘅嘢（我估

佢話其實好鍾意攬住我瞓，覺得聞到我就好有安全感？

同埋其中一樣鍾意我嘅嘢係我把聲，覺得聽我講嘢好舒服，就算本身心情唔好，打個電話畀我，就會開心返啲

仲叫我唔使咁冇自信，其實我身材好好，話想我帶埋佢去做gym
*
*
*
*
*
點解我會話敏感嘅感官呢，其實諗返轉頭，佢好似對身邊嘅嘢都會有好仔細嘅feeling
*
觸覺，唔一定要同sex有關，就算只係攬下拖下手，佢都會好開心
題外話最近我開始move on，身體接觸都有變得比以往多咗
*
視覺，身體曲線同個樣，但呢啲我都冇特登展現出嚟，好少着得好sexy或者化好濃妝
不過上次佢連我冇着衫都見過啦
*
味覺，呢個唔關事
*
嗅覺，佢真係好敏感，我噴香水（超淡嗰種），我沖完涼，我換衫，佢都會sense到，佢成日讚我搞到我都唔好意思，話係洗頭水沐浴露嘅功勞
*
聽覺，真係冇諗過，原來佢好鍾意聽到我講嘢，我把聲竟然可以令人變得心情好，以後要多啲出聲同佢傾偈先得

[Coco_StickyRiceLove]

你好，多謝你分享呢個經驗。你講得啱其實親密關係唔一定係要由性關係中建立。你提到伴侶對嗅覺、聽覺、觸覺等感官刺激非常敏感，例如：佢聞到你嘅氣味會覺得有安全感、鍾意你把聲、享受攬住瞓。呢啲其實係親密關係中好重要嘅非語言連繫方式。每個人嘅感官偏好唔同，有人對視覺如：樣貌、身材有反應強烈，有人對觸覺或嗅覺更敏感。你伴侶嘅特質顯示佢透過感官去建立情感依附，呢種依附模式其實好健康，可以成為你哋親密感嘅基礎。

另外雖然今次你扮醉意外聽到佢嘅真心話，但健康嘅關都係需要建基於直接、清晰、互相尊重嘅溝通，唔一定要偷偷等對方透露心地話。日後，你可以透過平日嘅對話，主動問佢：最鍾意我你啲咩，或者分享自己嘅感受，等佢都有機會坦誠表達。因為試探式行為即使出發點唔係惡意，長遠都可能削弱關係信任，因為真實嘅親密需要雙方都感到安全同被接納。

而你提到身體接觸比以前多咗，呢個係正面嘅進展。身體界線嘅慢慢放寬，通常反映雙方信任增加。你可以繼續觀察彼此嘅舒適區，同時主動作細心嘅溝通，可以令身體接觸更加同步。你哋現有嘅互動模式已經幾好，只要加入更多直接溝通，就可以令彼此更安心。