有人cap咗我有樣嘅裸照之後block咗我 佢本身話睇完就比錢我 而家我好驚佢會洩露我啲相比我識嘅人…我為咗錢做埋啲咁嘅嘢 仲要比人呃 好想死
你好呀，啱啱睇咗你留言，好明白你而家又驚又自責，但我想你先知道一件事，宜家你係受害者，而唔係做錯事嘅人。對方利用你嘅經濟需要，承諾完又走數仲要block你，呢個係佢嘅誠信問題，唔係你嘅問題。
明白你而家最驚嘅係相片會流出，但你要知道呢類人目的通常係錢，而唔係真係要散佈你嘅相，佢block你反而好大機會係因為覺得喺你身上搵唔到著數而轉移目標，如果佢真係想勒索你，佢唔會block你而會繼續迫你畀錢，所以你唔主動搵佢反而係最安全嘅做法。又或者佢覺得你唔係佢喜歡嘅類型，所以睇完就算，唔想俾錢。
你而家可以做嘅實質行動係cap低所有對話紀錄留低對方嘅用戶名同訊息，然後唔好再理會對方，唔好因為驚而求佢，否則只會令佢覺得可以繼續控制你。同時你要評估實際風險，如果佢冇你朋友或家人嘅聯絡方法，實際散播嘅難度其實好高。
情緒上請你記住，你嘅價值唔係由一張相決定，好多人都有類似經歷只係唔敢講，而呢件事會過去，最難捱嘅往往只係頭幾日嘅恐慌。同埋宜家AI咁盛行，網上流傳嘅相片係真定人工都未知，所以唔使太擔心。
同時，想藉呢個機會同你講，日後盡量唔好再隨意傳送私密相片俾任何人，即使對方講到天花亂墜、話會俾錢或者話好愛你，都唔好信。因為數碼影像一傳出去，你就會失去控制權，對方可以cap圖、可以轉發、可以儲存，你永遠唔知佢會點樣用。保護自己嘅身體影像，同保護自己嘅身體一樣重要。唔需要為咗錢或愛而去冒呢個風險。今次嘅經歷可以成為你日後一個好重要嘅界線，學識喺咩情況下都要守住自己，唔好因為一時需要或感動而交出自己唔想公開嘅嘢。你值得被尊重，而尊重嘅第一步，就係由自己開始，好好保護自己嘅私隱同安全。
如果之後有需要尋求專業機構嘅支援，好多機構都有提供保密嘅實際協助，例如「風雨蘭」（電話：2375 5322）可以協助向網絡平台要求移除未經同意發布嘅私密影像；而「午夜藍」同「關懷愛滋」都有處理影像性暴力嘅經驗。