Hello, 唔好意思，遲咗覆你。先答你三條問題：
第一，唔建議只等一星期，太早驗可能會假陰性。最好喺兩星期做細菌性檢測（淋病／披衣菌），再喺一個月後做HIV＋梅毒。
第二，係。一次陰性唔可以完全排除（尤其HIV同梅毒），建議檢測1-2次，結果相同就安心。
第三，可以一次過做全面性檢測，但因為空窗期唔同，可能要分階段再驗。
你而家可以盡快預約性健康診所、泌尿科或者家計會等機構，同醫生講「無套口交 + 有套陰道交」，佢哋會安排正確採樣。檢測前唔好自己亂食藥。如果出現任何唔舒服，立即求醫。
之後記得用安全套，口交都可以用口交膜或者安全套，減低風險。
其實好多性工作者為咗生計、自己嘅安全同健康，都會定期做檢查，同埋用安全套保障安全。但有時有啲客會拒絕用安全套，甚至中途除套，令性工作者感染風險增加。如果性工作者本身唔做陰道交，只係幫客手交或者口交，感染性病嘅風險其實相對低啲。另外，無論係口交定係陰莖插入陰道嘅性行為，你都可以主動要求用安全套，對自己同對方都係一份保障。性工作都係工作，性工作者都值得被尊重。
大多數人經過呢類暴露之後，最終檢測都會係陰性，細菌性性病大多都可以醫好。唔好過度自責或者焦慮，按時檢測就可以盡早確認。