同女朋友做之後一兩日佢會有尿道炎
試過幾次，自有過一兩次之後都沖左涼先做
但都仍然有，有咩原因/機會令佢有呢個病？
點先可以避免/有效防護？
尿道炎主要係外陰嘅致病細菌走入尿道引起發炎, 原因係外陰容易滋生細菌, 個人習慣 (如小便後錯誤的清潔方向) 同性行為都可以將細菌帶入尿道, 加上女生天生尿道較男生短, 細菌會比較容易拾級去感染膀胱甚至腎臟。
你女朋友係有性行為之前已經有尿道炎, 還是有性行為之後先有?
佢平時去完小便係點樣抹乾淨呢? 會唔會係由後面 (即肛門位置) 向前面 (尿道) 咁樣抹?
會唔會成日都焗到陰部呢?
宜家第一步係應該叫女朋友去睇醫生, 係好返之前暫停發生性行為。
要避免尿道炎再次發生, 就要保持外陰部健康同乾爽
- 小便之後清潔, 係應該由前面抹向後面, 避免將肛門及陰道附近細菌帶到尿道
- 多飲水令到定時有小便, 小便可以幫手沖走尿道的細菌
- 做愛之後小心清潔陰部, 同埋可以去小便沖走細菌
- 保持陰部乾爽, 護墊/M巾要勤換, 少著緊身嘅熱褲、絲襪同legging等
尿道炎可以參考衛生署家庭健康服務嘅介紹:
http://www.fhs.gov.hk/tc_chi/health_info/woman/9938.html
你地做愛嘅時候有冇整損下體？佢做愛之後會唔會去一次小便？
我地做完之後會沖涼，佢都會去小便
至於小便清潔方法我再留意下佢先
之前既尿道炎都係做愛之後，佢本身唔多飲水
但就成日想小便==
唔多飲水的話就唔容易沖走細菌, 咁樣會提高患尿道炎的機會
如果佢成日想小便而又去得唔多, 就好大機會以前已經唔舒服
不妨提醒佢多D飲水呢