陰道口成日同一個位損

我同男朋友拍左兩年拖,一直keep住間唔中都有性行為,但上年9月有一次同男朋友有性行為時發覺陰道好痛,每次男朋友進入時陰道入面更痛,完事後去小便時啲尿掂到某個位會覺得好乸,而且個排啲分泌有異味又少少黃色,就去左睇婦科醫生。醫生檢查完話有發炎有個位損左,開左塞藥、藥膏同口服藥物俾我,叫我個段時間都唔好有性行為就可以,個次都拎左啲分泌做念珠菌檢查,驗左係冇念珠菌既,但因為我有食開避孕藥醫生話會容易有念珠菌叫我都要小心啲。個次好返之後再有性行為時就好緊張好驚會痛,每次進入時都之前陰道口損過既位置都會有啲啜住入唔到咁,但明明陰道入面已經好濕潤,用左一段時間先冇事。但到尋日又係有性行為時陰道入面濕但之前損過既位置就覺得乾乾地而且會啜住咁,完事之後去小便沖涼都冇野,但到第二日朝早起身去小便覺得好乸好痛,一開始只係陰道口右邊痛,但隔多幾個鐘之後再去小便左邊都開始痛,去左睇醫生,醫生都係開返同之前一樣既藥,但今次就多左枝潔膚液,醫生亦話可能係有念珠菌但今次就冇驗到。我當時想問醫生點解我陰道口經常都係同一個位損,但因為個醫生年紀較大同埋當時診所多人等就冇問喇。
我有幾個問題希望各位可以解答下我的:

  1. 點解陰道口經常同一個位損,而且有性行為時好似只有個個位既分泌唔夠?
  2. 如果我想驗念珠菌除左搵醫生仲可以係邊驗?(因為睇專科醫生真係好貴…)
  3. 應唔應該叫埋男朋友一齊去驗?
  4. 有冇一啲較可靠收費又唔會太貴既醫生可以介紹?
  1. 有可能唔夠分泌,或者陰道口比較窄,容易刮傷。可以用水性潤滑劑幫幫忙,避免受傷

  2. 可以考慮私家醫院種菌,見醫生加種菌大概1000蚊。相對便宜的服務可以考慮家計會,化驗費用$550,但係未計見醫生嘅價錢,可以參考以下網址:
    http://www.famplan.org.hk/fpahk/zh/template1.asp?style=template1.asp&content=services/clinic/services.asp&nscref=19

  3. 通常念珠菌翻發的原因主要有兩個:第一,做愛或日常清潔不足。第二,自身抵抗力差導致陰道ph值受影響。
    未必需要男朋友驗,因為念珠菌係女性陰道常見的菌種,男生是很少有的。總之衛生是最重要,每次做愛前後都要清潔私處。

  4. 都係家計會,但係記得要電話或網上預約,冇得walk in

見你話醫生處方潔膚液俾你,我個人唔建議你用潔膚液,因為有時候潔膚液的ph值偏算,反而會令部分女生越洗越乾。只要小心清潔陰唇折疊位置,穿透氣的內褲就可以啦。等佢慢慢好,自己食多d酸奶、莓類水果都會有幫助。

Hello, 樓主,我呢2個月都係每次性交完陰道口同一個位損,睇過次專科,醫生係咁兒檢查話我好番緊。但之後再性交又損過。都係左右同一個位置。
想問下樓主你宜家好番未呀?同埋點解決呀?Thank you!:persevere:

Hello Katie, 我而家都算好返啦…我都因為呢個問題睇左幾次醫生,醫生話因爲我陰道口比較窄所以會容易啲損,同埋我發覺個個位損過一次之後就好易再損,可能因為入面啲皮膚脆弱啲掛lol
醫生後來開左盒藥膏俾我叫我如果再有損就薄薄地搽,我個人意見係你一日未完全好返一日都唔好做任何野,因為開頭損左你係小便都會痛,但過幾日就唔痛都唔代表你冇事,個傷口只係表面好左但其實你再有性行為一樣會磨擦到再損過。同埋可以既話最好照下鏡睇下係邊個位置有傷口,keep住乾淨啲,有性行為既時候要落多啲潤滑劑,唔只出面要搽,入面同你另一半都要搽,唔係完左你一樣有機會再損返

Hello aris! 請問你而家好返未?我呢幾個月前陰道口下面損過一次之後就不停損 照鏡睇係有一條線咁損。。一損之後我都會隔一個幾星期先同男朋友性行為 佢都等到我好濕先入 但都係會keep住損:sob::sob:唔知點算呀

Hello 其實你嘅情況都建議係未完全好返之前都避免任何插入式嘅性行為(包括指交!),因為好容易再摩擦到傷口,亦好容易令外界嘅細菌接觸到傷口再次造成感染。而且有陣時如果係由細菌引起嘅感染/損傷,有機會透過性行為傳染比你伴侶,而佢係無任何病徵嘅,直至下一次你哋再發生性行為,特別係無安全套嘅嘅,就可以將細菌再次傳返比你,變成反覆感染,好似一直都唔完全好返咁。不過,聽你講過損傷到持續咗幾個月,盡快睇醫生會更加好呀,特別係你暫停性行為後個損傷依然無好返!

另外,好似Aris嘅建議咁講,用額外嘅水性潤滑劑都會可以減低日後再造成損傷嘅。好多時女性嘅分泌物量都會因身體情況或者情緒而變化,同時好多女性本身嘅分泌物量都係唔足夠潤滑整個性交過程架。市面上有好多唔同款式嘅潤滑劑,如果要配合安全套使用加上你曾經有傷口陰道黏膜有機會變得薄啲,就要選擇水性嘅款式啦,一啲成人用品商店更加會有專門俾敏感肌膚使用嘅水性潤滑劑,可以進一步保護你嘅陰道。

明白!唔該哂你呀。因為我仲有陰道炎 念珠菌同b型鏈球菌 都斷唔到尾。我仲驚係菌太毒整損左外陰:cry::cry:

原則上你所講嘅菌都未至於會令外陰出現潰爛或者傷口嘅,不過既然你而家仲有啲感染未清好,真係要忍一忍暫時避免性行為啦:persevere: 因為特別係念珠菌,雖然男性都有機會受感染,但好多時佢哋都唔會出現任何病徵,所以再發生性行為嘅時候就會令你翻發!其實呢啲情況可以同醫生講,睇下有無需要伴侶都一齊食藥,咁就可以減少因為性行為而交叉傳染嘅機會啦!