男友背住我同另一個女仔傾計

文有點長,我冇其他朋友可以講到依件事,所以想係到發洩下

我同男友係因某隻online game識既,到依家一齊左3年幾,之前因為一個女網友而鬧交,之後我男友就應承我以後點都唔會再同依個女仔傾計,直到最近我又發現佢偷偷地同番個女仔傾計

個女仔叫絲絲(聽我男友講係有另一半既,但我冇查證,所以唔肯定真唔真),都係我男友打機識番尼,都係同一隻online game識既,只不過係佢地識先,之後男友先識到我,所以我開頭都唔知有依個女仔存在

只係有日見到男友同絲絲既曖昧wts內容,佢地以兄妹相稱,佢地對話內容都係好曖昧,成日都同對方講好掛住你,又話好想立即見到你(我同男友係香港人,絲絲係澳門人),男友又話女友係格尼唔方便傾計呀(原來佢每次同我行街都係同緊絲絲傾計),仲有其他甜言蜜語,我男友更加係乜都同佢講咁濟

之後比我發現左,我好唔開心,我都坦白同男友講我唔鐘意絲絲依個女仔,問男友可唔可以唔再同絲絲講野,因為佢地既對話太曖昧,我接受唔到佢地背住我咁做,之後男友就話,冇可能因為我而冇左依個朋友,叫我唔好太敏感,話絲絲有男朋友而絲絲都知道我既存在,叫我唔好亂呷醋,就同男友鬧交(大約係2年幾前既事),到最後佢應承我以後唔會再同絲絲傾計

到最近,比我無意中發現佢地又開始傾計,之後我問男友點解又開始同絲絲傾計,問佢記唔記得應承過我d乜,佢話因為之前澳門打風(天鴿)後受重創好嚴重所以先同番佢傾計

但係原來佢地由2016年就開始傾番計,有次仲要係我生日既日子傾計,都仲係甜言密語,之後我問點解佢地係2016年就開始同絲絲傾計,而唔係佢口中發生既天鴿事件先開始傾番計,佢再解釋唔到,只係叫我唔好亂諗

但今次就冇鬧交,只係冷戰左一日大家又當冇事發生咁,但我依幾日成個腦都諗起佢地背住我傾計依件事,我想問清楚,不過我知就算我問,佢一定唔會答我,但我真係好傷心

我傷心既係佢明知應承過我d乜,但唔去遵守承諾,其實佢應承過我好多野佢都做唔到,我都咕一聲吞落肚,唔同佢嘈

佢成日向我發脾氣,佢成日掛住打機而唔理我,之前係手機game>PS4>3DS,出親街佢都係望住電話同3DS多過望我都算,我都冇發佢脾氣,因為佢唔中意我亂發脾氣,我都理性咁同佢講以上既問題,佢都話會改,但一直改唔到,依d改唔到都算,我一次又一次咁忍,佢叫我改既野我都跟足佢要求去改,但點解佢對我既承諾就一個都做唔到?

果個絲絲,我真係唔想再見到佢地超級曖昧既對話內容,點解唔可以因為我地以後既關係而忘記絲絲依個女仔?唔通絲絲重要過我?其實我冇乜去限制佢交友,但唯獨絲絲我真係接受唔到

如果我又好似佢咁同某男講d咁曖昧既說話佢又會點諗?難道佢會接受到自己既女友周圍周其他男人搞曖昧?

如果佢識避嫌,我地就唔會再因絲絲而冷戰
有冇人可以同我講我應該要點做?

其實三言兩語, 好難話教你點做, 因為實在不是很清楚佢點諗, 而且, 任何一種做法, 出來的後果, 不一定如你預期, 但有很多人也會如下:

  1. 男仔好怕煩, 想留喺一度關係(可能女仔都係) 就係因為唔使煩, 關係唔會有壓力; 煩嘅, 佢地唔介意做自已嘢, 打機好, 睇電視好, 咩都好, 果幾個鐘頭個腦完全可以唔使諗任何同情感有關嘅嘢… 女仔煩, 會好想搵人傾, 傾完繼續煩… 24小時煩
  2. 男人眼睛好,心裡想好, 真係比你想像中想FANCY下其他關係, 無辦法, 這是因為男性的構造, 天生係想播種; 不過, 又唔好咁絕望, 聰明嘅男人會望, 會諗, 唔會做, 除非係笨男人(尤其結咗婚果啲); 如果理論啲講, 如果你遇上笨男人, 咁點解要同佢一齊咁笨? 要問自已留喺呢度關係係因為咩?!

OK, 我諗你要坐低靜靜地問自已, 你點解最初會鍾意佢? 最解繼續鍾意佢? 會唔會覺得佢係可以可見將來一齊走?

如果最後果個問題係 ‘可以’ , 咁呢個會係你嘅目標, 下一步, 相信你也同意, negative emotion 好難成事,要成事,一定要目標一致,要互相同意

你想佢以後唔搵呢個佢覺得係嘅朋友,佢覺得你小器—doesn’t work

咁你唔想佢搵個女仔, 係因為你怕佢地有嘢, 咁你要清楚講你不安嘅原因(因為怕佢地會出軌, 雖然澳門同香港真係都有一段距離, 佢地要出軌都要花幾多錢同時間)… 咁你話俾佢知你嘅底線, 例如: (I assume)完全不能接受佢地有無任像男女朋友的身體接觸… 佢同你一齊時, 唔好玩電話, 咁唔係針對個女仔, 係想同佢有quality time, 係尊重問題, 不只是個女仔, 其他人也是,但你都要做到喎!

僅有資料, 只有comment 到此

最後, 與其見面時疑神疑鬼, 你會易分心, 發脾氣, 不如, 花啲心思, 諗下大家一齊可以做啲咩係大家都ENJOY, 人生苦短, 今日都唔知聽日事, 去海洋公園Halloween 的那對情侶, 都估唔到出事, 係咪?!

好多關係都好像與外邊拔河(父母-仔女-外邊的不良朋輩; 男/女朋友-伴侣-外邊的誘惑), 發脾氣, 冷戰, 打打罵罵, 嘮嘮叨叨, 唔係拔緊河, it can only push away the relationship, 你要贏, 要諗方法, 唔好推走段關係咯, 點做?! 你先係自已關係嘅專家

最最後, 都要讚一讚我地女仔, 語言表達能力, 聰明程度, 有時比男仔都係勝一籌, 好好利用! Good luck

1個讚

其實我地係有講過一齊時唔好只係掛住望電話,其實依家佢連搭車行街食飯都離唔開手機同其他遊戲機,有好多佢要我一定要做到,我都做足哂,問題係佢自己就推翻哂所有野,變左佢咩都可以做,我就咩都唔可以做,我都有同佢講過依個問題,佢只會話比d時間佢改,就永遠都冇改善過…

至於絲絲,我有講過佢地既態度真係好曖昧,而我男友就覺得咁樣對其他女仔係好正常,佢身邊都有女性朋友係咁同佢傾計,但我從來冇呷過果d女仔醋…

唯獨依個絲絲真係特別既個體,佢係唯一一個我男友會維護既女仔…我只係講過唔中意佢地既曖昧關係,我男友就會舉一反三咁維護絲絲

其實我男友追我果時都冇同我講過咁多甜言蜜語,所以我真係唔明依個絲絲有咩魔力可以令我男友一直以來都甜言蜜語咁同佢傾計…

Sora;
首先你要諗下你了解你男朋友嗎?
畢竟你地認識咗一段時間,你應該解自己男朋友的性格,
佢係咪一個專一的人?還是花心?
大家都係成年人,唔可以話禁止對方做啲咩野,
大家有各自的自由,你愈限制人反效果愈大眾(especially男人)
我明白係難受,但只可以忍受,
至於男朋友會唔會因為你而改善就係佢嘅選擇.

其次係你自己對男朋友有幾大信心.
如果你有信心男朋友唔會因為同另一個女仔曖昧wtsapp對話而產生感情,
你根本不會擔心.
我覺得:如果佢係要同佢聯絡/發展,你點都阻止唔到,
與其去諗你男朋友會唔會同果個女仔發展,不如你搵活動參加下增值/提升自己價值,
令到你係男朋友眼中係幾咁吸引,
咁佢出街自然唔會掛住打機唔理你

最後寄一句:
感情問題並唔係單方面產生或單方面的責任,而是雙方都有責任去面對&解決,
因為我們並不是一個人而活着

同意樓上說法, 如果你愈把所有時間放在佢身上, 諗得太多, 你繞著佢為主, 咁好易變得demanding and desperate, 唔會好吸引 … 女仔好易在感情裡失去自己, 喺度一刻, 為自己做多啲嘢

同時, 集中處理的是你與佢之間的關係, 你個人的快樂, 因為只有在你地關係很穩妥的時候, 其他誘惑先唔會有機可乘, 要不, 今日係絲絲, 明日就係第二個咯

1個讚

Hi我可以用過來人嘅經驗比你參考下
我Ex同我行左兩年多啲 第一次嗌交都係好似你咁 我隻眼開隻眼閉 講過我嘅意見唔聽都算了 佢當時仲話好愛我 咁我當原諒佢唔知男女界線啦(佢a0)我同你講 原諒得一次自然有第二次 。
睇佢話口講話改係咪真係會改同埋之後仲有冇類似(曖昧)行為啦
最緊要潔身自愛