會吾會有咗?

28/4同男朋友親密,有帶套,冇進入過陰道,只係佢陰莖係陰唇磨。最後射精 但我好擔心個套好似穿咗(男友話冇) 所以30/4去咗家計會食事後丸。請問

  1. 懷孕的機會是否很低?
  2. 係咪會擾亂周期?
    3)經期會提前還是照完定日子來?
  3. 經期如提前嚟 流量會否減少?
  4. 嚟經時D M會吾會有吾同?
    我每個月都幾準,週期大約28-30日,上次18/4黎

謝解答…好擔心

1)懷孕機會比較低,首先因為陰莖由始至終都無進入過陰道,全程亦有帶安全套,即使真係穿咗,精子一接觸到空氣好快就會死,整個性行為過程期間精子/含有精子嘅分泌物都無直接接觸到陰道,所以機會不大。

2&3&4)因為事後丸係含有高劑量嘅荷爾蒙,所以有可能會影響下次經期(只係「有可能」而唔係「一定」)。下次經期可能係正常,亦有可能會提早或延遲,至於流量等其他都應該唔會有太大分別。如果下次月經比預期遲超過一星期,或者期間有任何異常出血或者懷疑懷孕嘅徵狀,就應該盡快再約見醫生。

不過,你今次嘅情況會懷孕嘅機會比較細,唔需要太過擔心。

多謝你既回覆。因為家計會D姑娘醫生態度好差,又嚇我話食左藥都可能會有左,令我更加擔心。我係擔心磨既時候個套穿咗,D精液會掂到我陰道口,進入我陰道,當日仲要係排卵期。
但依照你地既經驗,懷孕機會係咪比較細?
同埋食事後丸是否好傷身?宜家有D後悔。

明白你已經覺得好擔憂,再加上醫生護士比較嚴肅可能令你覺得好驚,不過佢哋所講食咗藥都可能會有咗唔係嚇你㗎,因為事後丸係透過高劑量荷爾蒙去阻慢排卵或者干擾受精過程,所以如果已經排卵或者精子已經同卵子結合甚至已經著床的話事後丸就會無效用。

不過唔駛太擔心,醫生了解過你嘅情況後認為你仍然適合食事後丸就應該會有效,而且你係120小時內食(家計會多數提供需於120小時內服用嘅事後丸),事後丸嘅效果嘅失敗率只有1-2%,唔需要太過擔心。

而且你今次嘅情況即使安全套真係穿咗令到精液接觸到你嘅陰道後,其實精子接觸到空氣後好快會死亡,而且精子數量會相對地少,亦無足夠嘅精液輔助精子成功進入你嘅陰道在達到子宮,所以懷孕嘅機會唔高。

至於事後丸傷唔傷身,暫時無研究指出會對身體做成明顯壞嘅影響,不過始終係高劑量嘅荷爾蒙,服用後身體出現少量不適都係正常嘅,一次半次作緊急用途就唔洗太擔心嘅,不過作為長期服用嘅避孕方法就唔好啦,事後丸係唔能夠代替常規嘅避孕方法既。

有人話食完事後丸4-5日就會嚟 今日第五日 (30/4食)仲未嚟,但原定日子(29日)係16/5嚟,咁係咪無須擔心?
同埋宜家有D作感冒 如果食感冒藥會吾會影響藥力/對身體有影響?謝謝

事後丸同感冒藥之間暫時都無研究指出會相互影響嘅,而且你30/4食嘅事後丸好肯定過咗咁多日都已經被身體吸收咗,所以你再食感冒藥都唔會影響到佢嘅藥效。

至於呢句說話,可能講嘅人咁啱係自己月經日子前幾日就食所以先會有呢個結果。照道理事後丸只能透過高劑量荷爾蒙去阻慢排卵或者干擾受精過程,並唔會令身體立即來m,只不過因為始終打亂咗身體一向嘅週期所以有機會令下一次月經日子提早或延遲少少。而如果你嘅月經週期應該係16/5先來,咁就應該係照返差唔多呢個日子先會嚟。

今日仲未有徵兆黎經(今日28日)得乳房脹痛,好擔心。家計會姑娘話如果21/5仲未黎經就要我返去同我驗孕。
我依家有冇咩可以做?真係好驚 :sob:

你一向週期都係28-30日,而食過事後丸係好有可能會影響下次月經,所以即使遲咗少少都唔需要太擔心。你而家可以做嘅就係放鬆心情,因為情緒都會影響月經架。你都可以選擇自行買驗孕棒驗孕令自己安心啲。

今日用咗驗孕棒驗,一條線陰性,係咪即係冇可能懷孕?但月經仲未嚟,已經第30日😭

基本上你用咗驗孕棒驗係陰性就無懷孕架啦,你一向週期都係28-30,而且事後丸影響下次經期真係好平常,唔需要過份擔心呀。你成日諗住好擔心都會影響到月經架。

我19/5嚟左,但月經只嚟左3日,平時5-6日,請問咁係咪正常?會吾會係咩假m? 嚟左經即係冇懷孕嘅可能?

你所講嘅假M其實係着床性出血,即使正常懷孕下亦唔係咁常見嘅情況。而且你已經驗咗係冇懷孕,事後丸影響你月經嘅日子其實真係好平常,唔需要太擔心。

今日(經期第六/七日)又突然有啲啡色分泌 尋日明明咩都冇,好似嚟完咁,平時經期5-6日。請問咁係咪正常?因為你都提過可能事後丸影響。其實我都嚟咗月經就冇嘢擔心?我下次經期會唔會都好亂?

:rofl::rofl::rofl:reply翻呢個兩年前呢個post

呢度提到事後丸如果排咗卵就會無效 想知其實係而家update咗資料? 因為都見到坊間分別有兩種講法 想問清楚少少:tipping_hand_woman:t2:thankss

Hello @seracohw :relaxed: :wave:t2:

坊間所講嘅兩種講法,主要係因為有唔同款式嘅事後丸,內含嘅荷爾蒙及功用未必一樣。有某D款式嘅功用只能抑制排卵,所以如果服用事後丸後已經排卵,咁就無法達到避孕效果。而依家較新型嘅事後丸,除左可以抑制排卵之外,亦能夠 改變子宮內受精卵著床的環境 (令受精卵難以著床)及改變子宮頸黏液的分泌 (令精子難以同卵子結合)。所以主要都係視乎番你所服用嘅事後丸係咩款式 :grinning:

所以服用事後丸前,需要經過醫生處方,係因為醫生能夠評估番你現時身體狀態,睇下會否身體有機會已經排卵,再俾返合適嘅事後丸你服用 :blush:

咁我想問levonorgestrel 有無抑制排卵以外嘅功效? 定係食之前排咗就無效? thanks ahh

我食嘅係安立婷啊:pleading_face:

Hello 見你7月12日嘅提問同埋之後喺其他平台都有提出同樣嘅問題,明白你好擔憂,但係同樣嘅問題我哋已經解釋過幾次,可能你都要嘗試去理解呢啲解釋,或者嘗試下用其他方式去解決。

既然你咁擔心懷孕風險,與其執著於緊急避孕藥嘅藥理訊息同埋醫療數據,同埋估估下擔心自己會唔會避孕失敗而懷孕,你不妨真係去進行驗孕,可能你親眼見到個驗孕結果都會安心啲。你嗰次嘅性行為係7月11號,其實去到今日已經過咗7日,進行驗孕會有初步結果。如果你想要更加準確嘅結果,就要等性行為嘅11日後(7月22號)進行驗孕。

驗孕嘅原理係測試尿液中嘅hCG水平,hCG係一種受精卵著床之後先會開始分泌嘅荷爾蒙,而卵子受精著床需要6-9日嘅時間,所以建議如果想要驗孕,性行為後7日進行驗孕會得到初步結果,而11日後就會有較為準確嘅結果。

至於你所食嘅「安立婷」屬於levonorgestrel呢種單一荷爾蒙(黃體酮)型(synthetic progestogen)嘅緊急避孕藥,我哋之前都解釋過,佢嘅功效有抑制排卵(preventing the release of an egg from the ovary)、阻礙卵子受精(preventing fertilisation of the egg by sperm)同埋改變子宮內膜嘅狀況從而令受精卵難以著床(changing the lining of the uterus to prevent development of a pregnancy)。

即係話,根據臨床研究,無論服藥前有冇排卵、卵子有冇受精,只要喺有限時間內(性行為後72小時內)服用,都可以有97-98%嘅避孕成功率。而嗰2-3%嘅失敗率可能係因為服藥之後嘔吐/肚瀉而令到身體唔能夠吸收藥物嘅有效成份,或者因為身體並唔係好適合使用呢一款藥,又或者服用嘅時間相對比較遲等等。但係現時除咗完全唔發生任何形式嘅性接觸之外,冇任何一種嘅避孕措施係100%有效嘅。而藥物方面亦然,冇一種藥物係可以聲稱100%有效,因為總會有特別案例或者個別嘅身體狀況。正如用必理痛止痛都未必係對個個人或者係每個痛症個案都有效,但唔代表必理痛唔係一款有功效嘅止痛藥。

同埋你係喺家計會睇醫生之後先食藥,醫生都會詳細詢問你好多問題,例如你發生完性行為幾耐、有冇體內射精、你之前嘅月經週期嘅情況、月經幾時出現幾時完、你有冇特殊嘅身體狀況、有冇需要長期服藥等等,護士亦應該有幫你量度身高、體重、血壓,醫生仔細評估完你嘅身體狀況覺得適合使用同埋會有效,先會俾呢款藥你食。同時醫生同護士都應該有俾到一啲相關資訊你,例如兩款藥嘅分別、服藥後有咩注意事項(例如唔可以飲酒)、如果嘔吐點處理等等。其實佢哋都會認為你嘅身體適合先會俾你食藥。而我地真係唔清楚你當日同醫生嘅對話係點樣嘅,會唔會係有咩誤會喺當中,可能你都可以試下打返去你去嘅嗰間家計會診所問返醫護人員,解除你嘅疑慮。

相比起發生完不安全性行為之後完全唔做任何緊急避孕,你嘅處理方式已經有一定嘅功效啦,而且你都有喺性行為後24小時內服用,對於呢一款藥嚟講,你得到嘅效用都會高過喺超過24個鐘之後食藥嘅效用,亦冇出現嘔吐腹瀉,你要有啲信心自己會喺嗰97-98%成功嘅機率入面。不如你設定個目標俾自己,7月22號驗孕之後就要嘗試放低呢件事,做下其他嘢令到自己放鬆啲、分散下注意力。

最後都建議你如果再有問題可以喺你本身發問嘅post到繼續提問,等我哋可以更加清楚咁了解返你所有嘅情況呀。