巳經遲黎m第6日...

我巳經遲黎m第6日,前晚用過曼秀雷敦牌驗孕棒驗孕顯示無懷孕。
我今年23歲,一向經期都準,最多早/遲1-2日,從未試過遲咁多。
上個月經期為4月24-29, 曾經在5月2及5月24與男友發生性行為,而且兩次都有使用安全套。
近呢一兩日個人成日都好攰加上胸部按下去會有小小痛,而且又無黎m。所以擔心自己會否懷孕或是身體出現了什麼毛病,想請問在這個情況下我該如何處理? 萬分感激!

你好!你係預計要來m嘅日子期間驗過孕,而結果係無的話,基本上懷孕嘅可能性都比較低嘅。發生性行為後有無檢查過安全套有冇穿?如果係完好無缺嘅話,會意外導致懷孕嘅風險亦比較低嘅。

月經始終可以俾好多嘢影響到,例如係生活習慣,飲食,壓力,情緒等等,會唔會係今個月生活上有咩特別改變影響到身體而你冇發覺?胸部覺得脹痛都係常見嘅m前徵兆來嘅,不過如果情況持續而且令你感覺不適,都可以考慮去睇一睇醫生嘅。

遲咗6日原則上都仲算係合理範圍內嘅,因為雖然你一向經期都準,但身體嘅變化都話唔埋嘅,可能係週期上有改動都唔出奇。