前列腺液一問

琴日14/6同男朋友有愛撫行為,下面有互相磨擦但係我地都有著住褲 (佢內褲&面褲_普通綿質短褲,我都係,即係共有四層布,我仲用咗護墊),佢話佢射咗前列腺液。
第一我想問請問精子有無可能由佢條底褲游過嚟?上網揾過資料,話要有watery medium先得,咁我護墊入面算唔算?因為我下面濕晒。同埋男人/女人底褲濕會唔會濕到面褲?
第二就係佢隻手有摸過我大脾內側邊邊啲敏感位,無入到去,只係隔住條底褲係咁搞,想請問如果佢隻手未洗會唔會好污漕?同埋會唔會hi到啲前列腺液入我到?
我地係初戀,性知識較貧乏,求解答,謝謝。
後話:香港性教育真係唔掂:( 問題可能好低B… sorry,但係我真乜都驚餐飽同乜都唔識 (我地暫時唔會再係咁架啦),所以想係到求安心&解答,唔該哂

明白你好擔心今次嘅情況,唔駛緊張放鬆心情先。

你哋隔住咁多衣物,精子係無可能進入到陰道再去到子宮成功受孕嘅。就算佢手上有接觸到前列腺液,隔著內褲亦無辦法將精子帶入你陰道。

另外其實前列腺液係男性性興奮時陰莖就會流出,內裡係含有少量精子嘅,但精子只要接觸到空氣或者其他物質或者有溫度改變好快就會死亡。而且亦要靠一定嘅媒介(精液/陰道分泌)先可以由陰道去到子宮,即使真係係陰道入面射精亦唔一定有精子成功去到子宮受孕。

多謝你嘅回答,我放心咗啲嘅……
另外想問,黐護墊對於防止精子進入陰道有無作用?係咪用咗就無可能懷孕?(因為唔會令到底褲濕?)
網上有太多資料講話男仔體外射精,明明無插入、而女仔即使著咗褲,都可能有咗,我唔知佢地係嚇人定係真,唉……請問你地有多啲呢方面資料嗎?

護墊本身就無避孕用途,不過如果你哋係隔住底褲互相摩擦,基本上隔住衣物,又無射精,可以導致懷孕嘅機會好低,你可以覺得痴咗護墊就好似再隔咗一層咁嘅。

至於你講體外射精而女仔有著褲但導致懷孕嘅個案,有機會係因為男方係陰部附近射精,而精液透過內褲邊流入陰道。但就咁講你都會覺得「下!有無可能呀」啦,我唔敢講完全冇機會,但真係好微。其實如果真係隔住衣物,精液無直接進入到陰道,真係好難導致到懷孕。

知道了~多謝你:pray::pray: