體外磨蹭再食事後丸會唔會都出事


#1

琴日同男朋友親熱,佢用龜頭磨蹭咗我陰道口幾次,每次都係先用手指插入去幾下再將龜頭放係陰道口十至二十秒左右。雖然無直接插入過,同埋應該冇精液(應該只係前列腺液),加上已經喺十二個鐘內食咗事後丸,但因為係危險期最後一日,驚會有事。上網睇到話就咁掂到都有機會懷孕,而且佢有將手指插入嚟。今日起身下腹有啲痛,自己胡思亂想驚係著床個啲,所以想知懷孕機率高唔高…謝謝解答


#2

希望可以儘快解答:cry:雖然男朋友同屋企人覺得應該冇事 但因為我係喺藥房買藥 而且冇即刻沖涼沖走 所以唔知會唔會降低成效 依家真係好擔心⋯


#3

無錯前列腺液當中係會含有少量精液,雖然今次情況陰莖無直接進入到陰道,但手指等到都的確係有機會令到精子進入到去。不過你係12小時內服食咗事後丸,正常情況下會懷孕嘅機率係比較低嘅。而且即使假設真係懷孕,其實都唔會係第二日早上就感覺到「著床」(而且呢個「著床」嘅感覺本身亦唔係咁明顯可以人人都體會到),所以你感覺到下腹有唔舒服,理論上係唔關懷唔懷孕事,唔駛太擔心呀。

不過都提醒番其實事後丸係香港係醫生處方藥物,係必須要有醫生紙先可以買嘅藥物/係診所等又醫生開藥,係藥房買到嘅藥有機會為咗避免警方放蛇而賣無藥盒嘅藥比人,有機會唔清楚知道食咗邊個牌子嘅藥,幾時過期,甚至粒藥係咪真係事後丸。你記唔記得藥房買到嘅係有無藥盒/有無過期等等啊?

而家暫時可以做嘅係7日後驗孕,可以得到初步結果。期間你都要盡量放鬆心情呀,因為過份緊張都有機會引起其他身體不適。同埋下次親密接觸,即使陰莖無直接進入到陰道,最好都用返安全措施,咁就唔使咁擔心啦!


#4

多謝你嘅解答:cry:因爲事後丸係媽媽係藥房幫我買再比食所以我唔清楚包裝上嘅野,不過食完之後個人好攰同埋下腹有啲痛,可能係副作用。
另外想知道食完之後白帶係咪會增多?今日有下feel到白帶湧出嚟就即刻去廁所睇,點知多到會滴出嚟,啲色有啲似鍊奶但稀度適中,聞落去有少少甜味,同平時唔同,唔知係咪同食咗藥有關呢?


#5

剛剛check咗可能係排卵期,上次m到係13/3,平時都係喺11-14號呢啲時間嚟,如果我係排卵期呢段食藥仲有冇效?:cry:


#6

一般嚟講食咗事後丸,因為係高劑量嘅荷爾蒙,都會有機會出現唔同嘅副作用,例如係覺得頭暈胸痛肚痛等等,所以你提及嘅覺得攰同埋下腹有啲痛,都有機會係副作用,多數係一兩日就會無咗,唔駛太擔心。至於白帶分泌變多,都有機會係事後丸內含嘅荷爾蒙產生嘅副作用,亦有機會係因為係你嘅排卵期,平常呢段時間之內白帶都會變多。可以觀察多一排,如果情況持續或者變差(顏色變黃變六綠/陰部覺得痕癢/等等)就要盡快去睇醫生啦。

事後丸係透過高劑量荷爾蒙去抑制排卵同阻止受精或著床,係排卵期期間食藥有冇用其實好視乎你本身體係咪已經排咗卵/卵子會唔會已經受精。不過你係發生性行為12小時內食藥,即使已經排卵,正常都未受精/著床,所以今次情況藥物有效嘅機會都會高。不過下次如果再有類似情況,記住要去睇咗醫生先啦(普通門診,私家診所,26歲以下亦可以去家計會青少年保健服務),醫生會幫你判斷你身體情況適唔適合食事後丸,同埋你當時cycle嘅狀況食藥有冇用。


#7

如果照咁講著床唔係呢兩三日嘅事,咁腹痛、腰痛同疲倦呢啲症狀都可能係事後丸副作用?因為今日按壓肚臍對落近右腹嘅位置好痛,又唔知係因為腸道問題定係子宮附近有事,有啲擔心