四月有問過因體外磨蹭驚會有咗，後尾到14/4就準時嚟M（一直都係12-14呢段時間），血量正常，嚟咗5日左右。去到今個月12號又嚟M，不過今次右邊恥骨位痛，以前冇試過，而且血量比上次少。上網睇話有咗都可能會嚟M，但我之前用三枝驗孕棒驗都係陰性。我依家應該驗多次嗎？驗孕棒會唔會驗唔到宮外孕等問題？謝謝
你連續嚟咗兩次m再加上三次驗孕結果都係陰性就可以排除懷孕嘅可能性架啦，因為雖然懷孕都有機會出血，但唔會好似月經咁多血同埋持續幾日嘅。
驗孕棒原理係透過尿液測試激素同荷爾蒙含量，只要有受精卵（不論著床位置）就會有反應，但個結果就無辦法反映到個受精卵係宮內定宮外。所以如果你驗孕結果係陰性，就可以排除係懷孕同宮外孕。
血量有改變其實唔係太大問題嘅，月經本身可以俾好多其他外在因素影響到，唔駛太過擔心。至於你覺得右邊恥骨痛，可以觀察多一排睇下有無繼續痛，如果有就去睇醫生檢查一下，但暫時就應該唔關月經或者懷孕事嘅。
多謝你嘅回覆我今朝有再驗多次但都係陰性，但上網睇又有人話懷孕2個月hcg太高會令驗孕棒失靈，所以都唔知點算。其實我幾乎冇其他徵狀，只係恥骨駁大脾嘅位實在太痛，上網睇又冇話係經痛嘅徵狀，反而係有咗先會咁。如果問題持續，係咪去睇婦科比較適合？因為都驚係子宮有問題
因為之後都連續嚟咗2次月經，基本上都可以排除懷孕機會架啦。至於驗孕棒會唔會失靈，的而且確唔係每一個產品嘅結果都會係100%準確，但你都試過驗幾次，唔會咁幸運咁多支都失靈嘅。同埋懷孕好多時都會有其他症狀架嘛，如果你暫時都無察覺有其他表徵，可以放心先呀。當然如果你都係好擔心，可以去診所／醫院要求驗血，結果就會更加準確嘅。
至於你覺得恥骨同大脾之間位置痛，當然盡早求醫係最安全嘅做法。如果唔想直接就睇婦科，都可以選擇睇普通門診／家庭醫生，排除咗其他病嘅可能性先。如果佢哋覺得有需要／懷疑就係子宮有問題都會再轉介你去睇婦科嘅。