同女朋友去咗沙灘玩，因為女朋友着得有啲性感，我感覺到自己有勃起。
上咗岸之後（無再落過水），我同佢講我好似硬咗，之後佢開玩笑咁樣掂咗我下邊一下。過咗幾分鐘之後，我哋就返返去更衣室換衫。
因為我問咗女朋友，佢話佢嗰陣時有換新底褲；同埋我換衫嗰陣時候都見到龜頭同埋包皮入邊積咗啲透明黏液，應該係前列腺液
所以我想問：
精子會唔會有機會穿過左濕咗嘅底褲同埋面褲（比海水整濕），係女朋友掂我嗰陣時候去到佢隻手，之後再係佢換底褲嗰陣時候，掂到下體令到佢懷孕？
Hello iamnervous，你嘅情況係無懷孕風險㗎！
懷孕嘅先決條件係女性處於排卵期，並有足夠份量嘅精液/前列腺液作為精子進入陰道嘅媒介。
雖然前列腺液中有機會有少量精子，但接觸到空氣/水嘅精子好快會死亡；而且你女朋友當時係隔住褲接觸你嘅陰莖，即使當時陰莖有前列腺液分泌，你嘅女朋友都係接觸唔到嘅；換言之，精子係無辦法進入陰道㗎。所以唔洗擔心㗎！
睇到你嗰名都知到你有D緊張，歡迎多D同我哋傾下計，同埋睇我哋Facebook/Instagram/Forum了解多D性知識，咁下次就唔洗咁擔心啦～
1個讚
好多謝你嘅回覆呀, 聽完你講個心定啲 
但係濕嘅環境 (濕咗嘅底褲同埋面褲(比海水整濕)) 會唔會都幫到精子去穿過條褲, 去到女朋友隻手?
同埋我真係好容易緊張 
, 就算佢掂一掂我下面, 我都覺得好似好容易會大肚; 搞到每次喺女朋友經期之前, 都會好緊張最後會唔嚟M, 但係又唔敢同其他人講 (同女朋友講又驚搞到佢緊張, 反而令佢遲啲嚟M) 
清水/海水並唔係適宜精子生存嘅環境；所以用水整到幾濕都好，令前列腺液中嘅精子越過衣物纖維而又繼續生存到嘅機會係微乎其微。
其實並唔係一接觸到性器官就會懷孕；只要未發生過有機會令精液接觸到陰道嘅性關係，都係唔會有BB㗎！
如果只係用手掂到前列腺液，只要唔係隨即直接接觸到陰道，基本上都無機會懷孕嘅。
知道你同女朋友會有一D親密嘅舉動，而你又會因為呢D行為同埋女友經期未到產生擔心。你女朋友經期未到令你擔心嘅原因係咩呢？之前有無咩辦法可以令你自己無咁擔心呀？
唔該晒你嘅解釋啊
麻煩晒
♂♂
係呀 我同女朋友有時會有啲親密嘅舉動, 我會隔住底褲摸佢下面; 佢都會隔住面褲摸下我下面
但每次我都好小心, 每次我知道 嗰日 有機會有親密舉動之前, 即使知道淨係隔住褲撫摸對方, 我都會事先用幾層保鮮紙包住自己下面, 求個安心 
之後我自己都會檢查底褲有冇濕（冇濕就即係我嘅分泌物冇滲到出嚟）
即使做晒咁多嘢, 但係每次佢嚟M之前, 我都會好緊張
擔心佢如果唔嚟嘅話, 係咪即係佢大左肚？我哋兩個仲讀緊大學, 如果真係有左, 點樣養大細佬？真係咁唔好彩中咗嘅話, 我女朋友又要面對其他人嘅異眼, 唔同人俾佢嘅壓力… 佢嘅人生節奏就會俾我影響晒… 我好鍾意佢, 真係唔想有啲咁嘅事情發生… 
（尤其係一年前我同佢第一次有咁親密嘅行為嗰陣時候, (如果你見到我一年前都有喺度post) 嗰陣時候懵盛盛嘅我, 摸完自己下面, 直接摸佢嘅陰部 - 果次真係搞到超級驚, 最後仲搞到佢 要冒着有副作用嘅風險去食事後 - 自此之後就好似有陰影咁 對親密行為非常之敏感）
有時我會諗: 又要摸, 又要驚 (俾人知道我內心有啲咁嘅掙扎一定俾人笑到面青), 我一定要盡力唔好掂佢 
但係到頭來 - 我哋有機會獨處嗰陣時候, 往往都會情不自禁… 因為其實佢有呢個需要, 我亦都有; 而我哋兩個都真係享受其中 - 所以真係好難避免
(我真係好犯賤 ）
而之後同佢有親密接觸嗰陣時候, 又會開始有啲驚, 有少少後悔…
就好似一個惡性循環咁 不斷loop
同埋我驚有一日我哋再進一步 - 真係除衫幫對方摸嗰陣時候, 又會唔會發生啲乜嘢意外呢？… (不過其實我哋有共識 係結婚之前都唔會有插入式性行為)
anyway 有事我都好慶幸有呢個平台俾我喺度呻
俾我呻一啲 我唔敢同其他人講嘅嘢
其實用幾層保鮮紙包住陰莖係不必要同唔正確㗎！
因為保鮮紙嘅塑膠材質長時間包裹陰莖皮膚可能會令皮膚敏感；而且精子體積比保鮮紙嘅纖維空隙要細，如果有射精嘅話，保鮮紙係做唔到避孕作用㗎！
其實如果無發生不安全陰道性交嘅話，懷孕嘅風險真係好微好微，所以真係唔需要太過擔心㗎。有正確嘅性知識同安全意識，先可以進一步預防意外嘅發生～
你都想同女朋友親密D，但又擔心會有不良影響，呢樣嘢為你帶嚟嘅心理壓力。睇得出你真係好在乎另一半。如果可以，都鼓勵你多D同另一半傾下呢方面嘅憂慮以及心情。
當然糖不甩都會繼續陪住你哋，做你哋嘅樹窿啦～
2個讚
想問精子係空氣存活嘅時間有幾長，我都有類似情況不過喺床上邊，但全程都冇將龜頭插入陰道，咁樣會唔會有事㗎，求解答
你話喺床上面即係點樣啊？係指精液落喺床上而擔心女方唔小心接觸到精液而懷孕？？
精子存活時間好視乎環境因素，例如溫度、濕度、酸鹼值等等影響。
除咗喺特別控制嘅實驗室環境之外，精子一般情況下喺體外通常數分鐘內就會死亡㗎啦～
所以如果無進行 不安全的陰道性交、亦唔係特登打開陰唇又對準陰道口射精，令女方意外懷孕嘅風險其實低到幾乎可以不計，都毋須過分擔心㗎！