我男朋友驗到感染了 hpv高危型號56，
他對上一次性經驗差不多是8年前，以前每次都有帶套 。雖然知道帶套不能完全預防，而且hpv dna test 都有96%準確，但帶套已能大大減低感染機會，而且事隔多年，理論上大部份人身體免疫力都能自行清除感染。我想問，他應否再做多次測試？雖然positive都合理，但我覺得應該negative的機會更大，覺得有沒有可能是假陽性？或者是近年從不潔的地方感染到(例如廁所)，身體未來得及清除，應該再等多兩年去repeat test嗎？
Hpv 56型暫時疫苗不能保護，如果他真的是從前女友身上感染到 ，這麼多年都未能自行清除，那麼都能斷定是終生帶菌了吧。難道跟他結婚要冒着生子宮頸癌的風險嗎？
我自己比較保守，未有性行為，交往以來都一直為他曾經有性經驗而感到不愉快，很討厭他們液體交流的感覺，很少事都能令我腦補出他跟別人做愛，進進出出的畫面，感到極不舒服，這非常影響我們關係，今次知道男朋友感染hpv，實在覺得很傷心難受，希望你能給我少少建議，謝謝
你好呀
，睇得出因為呢件事你好緊張，都好唔開心。理解你既擔心係出於對男友既愛，不過首先想同你講，其實HPV並不等同於絕症，都並唔係一個標籤，只係有機會痊癒既普通病症之一；其次我諗除左對抗病症既方法之外，你同佢之間如何交流都會起到一個好關鍵既作用。下面係一些建議：）
首先想問下你，男友係邊度做HPV測試，而醫生有無同佢講解佢既情況呢？現時就有唔少私家提供包含驗HPV既男性性病查驗，但要留心同女性唔同，男性既HPV暫時無普遍認證既篩查方法，根據美國衛生及公共服務部資料顯示，現時既檢驗方法都未得到官方認證。所以如果如你所講結果顯示係positive，其實都有一定誤差既可能，如果負擔得到可以考慮做多次檢查。如果可以確診佢真係高危HPV positive，都仲有應對既辦法。對男性黎講，感染高危HPV而導致患上癌症既機會其實好細。雖然呢方面並無藥物可以針對治療，但通過提高自身免疫力，男性多數都已經可以消除HPV感染或者抑制HPV病變。而你擔憂既多年都未清除係咪會終生帶菌，其實就未必係。HPV有潛伏期，即使宜家即刻接觸HPV病毒，可能要數月甚至數年先檢測到自身既病毒。因此具體既感染時間好難追蹤，即使男友對上一次性行為係8年之前，都唔可以話佢一定係8年前成為HPV感染者。至於係咪有機會通過廁格傳染，只可以話宜家醫學界都冇定論通過接觸物體表面係咪可以傳染HPV。但無論係通過性行為，定係其他可能既方式，宜家都冇任何辦法確認男友患上既時間以及係比邊個傳染。如果你願意同佢一起對抗HPV，都係仲有機會架。未來係咪清除得到，就要睇男友既健康情況同埋佢既免疫系統，要多多留意日常既飲食同埋健康習慣。
除左通過醫學資料瞭解男友既情況，或許更重要既係問下佢自己既諗法。佢係咪瞭解HPV既知識呢？佢點睇自己既情況，又係咪願意同你分享佢既決定呢？醫生或許都有同佢brief下，其實即使高危HPV都有自己醫好自己既可能，而佢既心情同態度就至關重要。伴侶確診HPV為你帶黎唔少困擾，但對佢本人而言，或許更係有許多疑惑擺係佢面前。二人溝通其實係至關重要。其實HPV係非常、非常普遍既性病，無論低危型定係高危型，多數人一世都有機會感染一次，感染都唔代表呢個人性活躍，亦都唔代表佢衛生習慣一定差，許多HPV感染者亦都係單一性伴侶。是否用尊重佢過去既態度繼續同佢一齊，其實就係你既選擇。
睇到你有考慮同佢結婚但又擔憂HPV既風險，其實都好理解。同佢一齊唔代表未來就會生子宮頸癌，但係防範癌症呢方面就需要二人不斷咁去努力。未來可能既性行為都應該使用condom盡可能降低風險，結婚前都需要做下婚前檢查，聽吓醫生既建議。而無論你未來係咪決定同佢發生唔安全性行為，都要定期進行進行子宮頸抹片檢查（檢查有無癌細胞變異），以及HPV病毒篩檢（檢查有無HPV）。其實相比男性，女性檢測HPV既方法更加可靠而又普遍，家計會同社會衛生科亦都提供相關檢查。通過定期既檢查結合良好既習慣，即使感染HPV都有機會抑制病變細胞，避免病變變成子宮頸癌。
每個人都有自己唔同既過去，你會介意佢之前既經驗唔係錯，而佢之前發生性行為亦都唔係錯。既然無對錯之分，其實更多係兩個人之間如何坦誠相待。會唔會諗吓點解你會好愛佢，睇返你地兩個係一齊既時光呢？如果你仍決定與佢繼續呢段關係，就需要同佢溝通，係佢既幫助下盡量消除你既心結。理解每個人對性有唔同睇法，但其實人係好複雜既個體，對性既態度、經驗都只係一個人既一小部分。如果決定做長期既伴侶，咁仲有好長既路需要一齊行，所以要live in the present而唔係live in the past呀：）無論你做出咩決定，都尊重，同埋希望你未來可以開心快樂：）
好多謝你答得我咁長阿，我覺得自己感情好有潔癖，我都明白每個人過去都唔一樣，有做無做都沒有對錯。。。但道理明白，感覺就是不能妥協。。。我都知道hpv係好common，亦不是什麼絕症，但我就是一粒病毒都不想從佢ex身上得到。。。佢已經好配合我去幫我解個結，我知佢好鍚我，所以當我表示我擔心佢之前ge人令佢感染，佢都二話不說會配合去做檢查。。。我諗如果比着其他人，一定反面。。。但暫時我的心結似乎沒有解到。。。佢同我都唔知可以點做，佢覺得我只能靠我自己接受。。。同埋我的行為令到佢覺得自己污糟，覺得自己唔好，配唔上我，同埋覺得自己以前唔識諗做錯左。。。我知自己令到佢咁樣睇自己係完全唔應該，同埋對段關係唔健康。。。但我覺得唔舒服就係唔舒服，我自己都唔想，同d人有潔癖係咁洗手一樣道理，即使明知會洗爛手都會唔會停止係咁洗手。。。我明白為左d已成過去，又改變唔到ge事糾結係好蠢，知道應該着重佢而家有幾鍚我，但我就係一直都會糾結同投入唔到更深的關係同感覺。。。
我係叫佢去依間診所度睇嫁，感覺好準確，但佢仲未有時間去見醫生，同埋佢對hpv的認識我覺得沒有十分了解，亦不知道要做邊d檢查，今次都係我搵比佢，叫佢去check。。。我自己有看很多報章，但事前事後我唔多敢send太多有關依類資訊比佢睇，因為我覺得站係佢角度，我咁做會好刺痛佢令佢覺得更加唔開心，崩口人忌崩口碗的道理 ，我唔敢係咁force佢去做，同又迫佢去睇醫生，係咁提佢依樣野，我會覺得自己煩，亦驚佢覺得我煩同討厭，但佢性格又係要叫好多次先會主動處理事情。。。佢性格亦都唔多同人傾唔多同人分享感受，依點我有同佢講過好多次，但沒有太大改進，有時又會感到氣餒，講又唔岩，唔講又唔得。。。感覺成日都係得我迫佢，我會覺得自己煩，同覺得心累。。。https://www.neohealth.com.hk/ch/blogs/item/819-hpv.html
聽你既講述，感覺你同你既男友其實感情都唔錯，咁你會唔會考慮慢慢克服自己對佢過去既執著？其實你面對既選擇，就係一係遵從自己對「唔想伴侶之前有過性行為」呢條標準既執著，同無性經驗既男仔拍拖；一係就係同男友一齊去克服佢既HPV，同埋你心理上既包袱。但我諗你都明白，呢兩種選擇其實都會出現唔同既煩惱、問題。生活係好難做到十全十美。可能你會覺得自己既執著同男友兩個都難以捨棄，但選擇一個，就需要放低另一個，如果唔係就會比兩者拉扯，陷入更長久既痛苦。或許係迷茫之中，你可以轉番頭諗下「唔想伴侶之前有過性行為」呢件事，其實對你有幾重要？點解咁重要，而佢又係邊度黎？係宗教，價值觀，定係控制慾？我地既行為、諗法，其實都係受各類信息影響而慢慢建立，背後或多或少都會反映到我地既性格、價值（value）或者信仰（belief）。或許你可以坐定定，諗一諗自己認為理所當然既嘢背後究竟係咩原因，解剖自己既諗法，再list出黎呢樣嘢為你帶黎既pros and cons。
你提到自己好似有「感情潔癖」咁，其實感情潔癖又好，行為潔癖又好，都係一種心理現象，經過長期既糾正，係絕對有機會改變到。就算唔可以完全消除，都可以減輕。不過有留意到你話自己「唔想妥協」、「唔舒服就係唔舒服」，好似你本身對自己既感情潔癖又都難以捨棄，咁你內心其實係咪傾向去改變自己既諗法呢？可能你會想問一問自己，我係咪願意為左呢個男仔而改變自己？我係咪真係認為佢冇過錯？如果你下定決心擺脫呢種潔癖，都需要你自己去留心自己不良情緒既觸發點（trigger），再嘗試用唔同既方法令自己既情緒消散。但你既男友既角色都好重要，你會需要話比佢知，你願意為佢做出努力，但都需要佢既幫助。要改變自己習慣性既情緒確實好困難，因此你都需要有一個人係你身邊去陪你克服。你可以試下去同男友不斷update自己既狀態，並希望佢可以包容你呢個改變過程中既情緒不穩，多啲比你鼓勵，令你知道你唔係自己一個。下次厭惡既情緒再出現，令到你感到唔舒服時，或許你可以用講笑既方式話比佢知，唔好自己一個人收埋，而係兩人用比較輕鬆既方式去溝通，咁樣可能會比到你自己「其實我完全可以戰勝我既感情潔癖」既積極心理暗示。而獨處時，你都可以多啲問自己，呢種「感情潔癖」帶比我啲咩？我係咪要任由自己用partner既過去，去定義佢份人？試下通過分析利弊而消化自己既情感。
睇得出宜家你心入面既問題都好多，所以希望你可以比自己啲時間，同自己對話，諗吓自己既priority。都希望你知道，就算宜家你腦海中有幾咁亂，解決既辦法都會有，亦都有求助既渠道，你唔係孤單一個。至於男友HPV既治療，相信暫時佢最需要既都是約見下醫生，瞭解病情。理解你好關心佢，或許你可以搵個比較輕鬆既場合同時間，將你知既資訊同你既建議話比佢聽，再表達你對佢意願既尊重，去相信佢做既決定。都希望你既男友可以理解就算係高危HPV，都唔代表一定生癌症，唔需要過度驚慌。如果你願意，你地都可以一齊傾下未來應對HPV既plan，將所有野一齊分擔。希望你地既溝通順利
好多謝你比左依個建議我，我會試下再同佢傾番我地未來點做，同請求佢ge幫助。當有野trigger到我時我試下去同佢講番，之前我好多都無講，覺得講左又整到大家唔開心，於是忍，忍到忍唔到又發佢脾氣捉佢來嘈。。。。我諗我係因為價值觀同佔有慾，所以會有咁ge感覺同諗法。所以初初同佢拍拖時感情比較淺，無咁介意，慢慢越深越執著，越問得多越知得多，於是越來越銀住，越來越多trigger位令我有負面情緒。。。。
同埋佢已經見左醫生啦，不過個醫生都係答番d上網都搵到ge資訊，又唔比我陪佢入去聽，我問唔到d我唔明ge野。。。。所以我藉此想問，唔知你係醫生定相關人事呢？感覺你給出的資訊同建議都好到位。我想借機問下，唔知你知唔知道，假設我中左hpv16,又假設我靠自己免疫力痊癒/抑壓到個病毒至 hpv dna test negative，跟住打番現有的疫苗，疫苗能唔能夠重新保護我免受hpv16感染呢？即係我知道疫苗不能治愈已感染病毒，但想問如果好番又算唔算數呢？
係呀，其實你之前既溝通方法比較似passive aggressive性格既人既方式，即係內心唔舒服，但又想避免衝突，就將個feeling收埋係心入面，表現到好似無事，但同時又情不自禁會以間接既方式表達不滿，好似抗議緊。理解你會想照顧男朋友既感受，不過你都要比男朋友機會去深入瞭解你既內心。其實我相信如果佢開始去瞭解你既trigger位，佢都會係呢段關係中慢慢進步，去學識如何照顧你，同你一齊承擔起維繫呢段感情既責任。人與人既溝通唔係一係就發洩情緒，一係就完全收埋，而係係二者中間去試圖搵一個既唔傷害對方，又表達到自己feeling既位。我相信你做得到：）
男友HPV方面，醫生唔比你入去聽其實係好常見既做法，因為牽涉到病人私隱，一般至多都只係比直系家屬入去一齊聽。下次覆診之前，你可以同男朋友傾下你既疑問，再由佢去問醫生。因為始終件事係佢身上，最好就係你地兩個對件事既瞭解程度可以達到同一個level，等男朋友都完全明白你既concern。不過worst case如果男友真係唔明，你都可以寫低啲問題比醫生睇，再等佢解答你。
見你之後問左啲好專業既野，我就可以分享下瞭解既資訊。不過因為我都唔係專業人士
，所以就真係需要你搵醫生去諮詢啦。醫學界既共識係HPV疫苗唔可以治療HPV，而一般黎講亦都認為HPV疫苗唔可以為之前感染過既人提供有效既保護。不過近年都有項研究發現對之前感染過HPV既女性注射疫苗，佢地既免疫細胞水平都高左（來源），同另一項研究發現HPV疫苗對之前感染過HPV既女性起到一定效果，不過相比之下對未有感染既女性就係83%既有效保護，而感染過既女性就只係53%（來源）。其實曾經感染過HPV既人都可以考慮打針，但主要並唔係針對佢地感染過既果隻病毒，而係因為現時一隻HPV疫苗可以預防幾種HPV病毒，所以擴大左保護範圍。如果覺得有需要其實都有得諗，但係咪真係可以打都視乎個人體質同情況，所以要諮詢下醫生。
同埋都想知下男朋友係驗到感染HPV56型，點解會諗起自己中左HPV16型呢種情況呢，係咪有咩其他concern呢？：）
又多謝多次你答我答得咁詳細，我想唔起點解我會想知，諗諗下就諗到依點，我可能諗緊，如果未來再出隻新藥，可以包到56，咁即使我同佢都感染過56，咁再打番新針咪有效保護到我囉～