棉條新手問題

試過2次放棉條 但都真係好驚好緊張
我已經睇過好多有關資料同video
理性上我完全知道棉條應該係好易用方便
但到試就真係完全擺唔到入身體入面… 我想問其實會唔會可以去醫生到等佢幫我擺 或者會唔會有d咩方法 thanks

你覺得驚嘅原因係咩?係驚有嘢進入陰道嘅感覺?定係擔心可能拎唔返出嚟?醫生就應該唔會幫你放入陰道,即使肯幫你,每隔幾個鐘要換一次相信醫生都無辦法可以keep住幫你呀。

個人經驗覺得其實好似如廁咁坐係廁所上面,身體微微向前傾都會幾容易將棉條放入陰道嘅。另外都要令自己心情放鬆一啲,太過擔心自己會放唔到反而會令陰道肌肉更收緊,變相更難放入去呀。同埋都要揀一個適合自己嘅棉條尺寸,如果係初次嘗試或者本身無太多性經驗,可以先嘗試一啲比較細流量嘅棉條,適應咗再轉換大流量嘅。可以揀係有較多經血嘅日子去嘗試,亦會比較容易放入陰道架。最後就係,比起要用直接手指輔助進入嘅棉條,用有導管嘅棉條會比較容易上手,可以考慮下啊!