以一個20歲男仔泥講 幾耐打一次先叫正常？
打得多係唔係會對做愛有影響？
有時同女朋友做做下會無咁硬QQ
會因為無咁硬而插唔到入去
想改善呢個情況
有無人答到我
你好呀
，男仔自慰也就是俗稱既打飛機係一種健康又常見既性行為，而究竟一個所謂正常既人幾耐會打一次飛機，其實冇正確答案架！即使自慰既頻率超過一日一次，都可以叫好正常或者好健康，而前提就係無影響你既學習、工作同社交生活。每個人自慰既頻率都會唔同，所以其實係冇一個萬能答案架，只要你感覺放鬆到自己、體驗到性愉悅、又完全handle到生活既其他部分，就啱啦：）
一般黎講，自慰並唔多影響你既性表現，醫學研究方面既共識係自慰唔會令到你勃起障礙（ED/erectile dysfunction，所謂既冇咁硬甚至扯唔起）。ED反而多係同用藥，體重過重，慢性疾病，飲酒或者吸煙或者一啲心理因素有關係。你提到同女朋友做愛時會無咁硬，我諗你既意思係做愛時冇自慰時咁硬，咁其實都確定到生理方面你係有能力達到滿意既勃起程度，唔大機會係身體既問題。所以或許要睇返你本身既性行為過程。譬如性行為中你會唔會有時有壓力或者心情比較緊張呢？而你講既「做做下」具體指做幾耐呢？會唔會係性行為過程中分心？咁既情況出現幾耐？總之成個性行為既過程中有好多變量，都有機會影響到你既勃起硬度。或者你可以試下留意平時做愛時，有咩情境係刺激到你勃起，譬如你身體敏感既位、你鍾意既環境或姿勢。再出現所謂「冇咁硬」既情況，就自己去搵下啲敏感位，維持果種刺激。
同埋都想提提你，做愛過程中勃起硬度有改變係好正常既，唔使擔心，都唔使比自己好大壓力。所以都不妨同女朋友傾下，再有咁既情況，如果佢願意，其實都可以幫助你刺激身體，恢復返硬度：）而如果做左上面所有既野，你依然有疑慮係咪係自慰影響到你既性愛，其實最簡單既方法：停止自慰幾日，再睇做愛既表現。因為每個人身體構造唔同，尋找最適合自己既性之道其實都係一個有趣既過程呀。希望你既性生活愉快：）