家計會墮胎

五月尾食咗粒ellaone,到宜家都未黎M。上個月尾有去家計會驗孕,但係就話無懷孕。想問如果17歲去落B會唔會通知家長?

未夠18、好似要家長簽名!

你好呀:wave:,ellaOne係120小時內有效既緊急避孕丸,所以只要你係性愛後五日之內服用,就可以成功避孕,而越早食用效果越好。同時記得一定要係正規診所或者家計會開既ellaOne,先可以保證有效。而緊急避孕丸(俗稱既「事後丸」)因為荷爾蒙含量高,都會有一定程度既副作用,譬如頭暈、感覺嘔心、胸部酸痛,都包括月經提早黎或者遲黎。所以如果你係有效日子內服用,而m遲黎,相信只係荷爾蒙在作祟,同懷孕關係唔大。

如果係五月尾食用,咁就假設你都係五月尾有進行性行為,隔左一個月六月尾驗孕既話,結果應該已經好準備,即係一定冇懷孕啦:)要相信驗孕結果,唔駛太過驚慌。不過見你問到家計會既終止懷孕服務,其實家計會既服務係保密既,如果你拒絕佢地亦都冇渠道去通知你既屋企人。但相信要進行終止懷孕既手術既話,無論幾多歲姑娘都會建議你話比屋企人知,因為始終係有風險既,屋企人知會穩陣好多。

其實你既情況應該係冇懷孕既,但見到你咁緊張,其實以後都可以考慮性行為使用安全措施呀:)使用安全套,或者係醫生同意下服用長效避孕丸、打避孕針(家計會有提供),都係有效又方便既避孕方法。因為事後丸唔係避孕既長久之計,頻繁使用真係會對身體造成傷害。同理終止懷孕手術不僅麻煩,都會對身體造成傷害,所以如果無懷孕既準備,真係要做好避孕工作呀。希望你未來在保護好自己身體既同時,可以享受性既快樂:)