我同伴侶今天(10/7)發生親密行為，喺佢插入前已帶套，在體內射喺套入面抽出檢查個套無穿無漏，我今個月經期日子係1/7-6/7，連續呢3個月經期都好準時，大概相隔26天！我手機apps顯示今天係危險期還有3天會排卵！我好擔心，需要11天後驗孕嗎？
我同伴侶因爲某d原因有共識唔想要bb，搞到我每次發生親密行為都變得好憂心！我在半年前試過轉食避孕藥再加安全套，但係我身體嚴重唔適應同唔舒服，醫生建議我停服避孕藥，所以而家只可以在進行親密行為時做足安全措施！
唔好意思可能會比較長篇，但係我真係好擔心同埋影響到我既情緒，我伴侶都知道佢都同我講過唔駛太擔心！而家我都唔知點算好？
明白你嘅擔心，不過安全套如果無穿漏嘅話已經相當安全，過程中如果都無其他位置有體液上嘅直接接觸，懷孕嘅機率係近乎零架。至於計算經期嘅apps所提供嘅數字，建議只係用來做參考就夠啦，雖然你最近幾次經期都比較準時同規律，但月經本身係好容易受唔同嘅外在同內在因素所影響到嘅，而且所謂嘅「危險期」「安全期」排卵嘅日子等其實都只係推斷嘅數字，往往都係要等月經出現先可以比較準確咁去理解，但都唔係100%架。所以比較安全嘅做法都係每次親密接觸都做足安全措施呀。
至於藥物方面，當時醫生有無話係唔識合任何形式嘅荷爾蒙避孕法定單純係要停止當時服用緊果一隻藥？因為而家避孕藥嘅牌子有好多，唔同牌子嘅荷爾蒙劑量都會有差別，有可能另一隻藥係你身上會有較少副作用，或者都可以考慮下打避孕針或者用避孕貼。
如果所有荷爾蒙避孕法都唔適合，都仲有其他俾人方法可以考慮嘅，例如係子宮帽 （https://www.famplan.org.hk/zh/health-info/contraceptive-methods/intra-uterine-contraceptive-device-iucd ）。呢樣會係相對上比較長期同較低失敗率嘅避孕工具，不過同時係配戴前後都會需要更詳細嘅檢查。可以同伴侶商量一下，或者問下醫生意見，再去決定要唔要改用其他嘅避孕方法。
每一種避孕方法都唔能夠100%保證完全唔會有懷孕嘅機會，而安全套只要正確咁使用，確保過程中有足夠潤滑，亦有係射精後盡快取出，避孕率已經係相當之高，而且亦係比較方便使用嘅工具。可以嘗試同伴侶一齊檢視一次一向用套嘅習慣，確保當中無任何有機會出錯嘅步驟，俾啲信心雙方，因為你哋已經盡咗力去做到最足去避免懷孕。
我都明白可以做既都做哂，而家既情況我係咪需要喺11天後驗孕先可以真係放心呢？
另外我因爲自己既身體問題唔可以用荷爾蒙既避孕方法，而家只可以喺有親密行為時做足安全措施，所以總係放心唔到⋯
11日後驗孕嘅結果已經會相當準確，到時只要按足說明書上指示去做，要相信得到嘅結果呀。
如果無辦法用任何荷爾蒙類嘅避孕法，咁除咗按足步驟使用安全套，可以係有用套嘅情況下再體外射精，即係即使有帶安全套，係臨射精嘅時候都要抽離陰道，係體外（遠離女方身體）射精，咁相對上都可以再減少啲風險。同埋留意多啲陰道嘅潤滑度，有好多女性嘅分泌其實都未必係好多或者會持續整個性交過程都不停分泌，如果太乾的話都會令安全套更加容易破裂。可以試下配合用潤滑劑，不過要記住乳膠安全套係唔可以同油性嘅物質（bb油，Vaseline等）一齊使用，會侵蝕乳膠架，要揀返水性或者矽性嘅潤滑劑去使用！或者考慮其他形式嘅避孕工具，好似我上個回覆講嘅子宮環（上次打錯咗，應該係「子宮環」先啱），都係一個可以提升避孕率嘅方法。
另外就係，要相信你同伴侶為咗避孕已經盡咗努力，亦要相信你哋所使用嘅避孕方法，只要正確使用避孕率一樣係好高。過份憂慮都會影響情緒同精神健康，亦可能會為你哋之間嘅關係帶來壓力同磨擦。如果依然對避孕方法感到無信任或者擔心懷孕，亦都可以試下同伴侶協調會唔會暫時停止陰道交或者任何會有直接體液接觸嘅親密行為，試下用其他行為去代替，例如互相口交，指教或者互相幫對方自慰，去減少風險。直到大家都準備好，或者對避孕方法重獲信心再去嘗試陰道交。