陰道炎後無性慾 求教

之前有過陰道炎 睇過婦科
塞左藥 感覺好番
但自從個次之後我就發現性慾下降
發生關係時好乾好痛
會唔會係未好番?
有咩方法可以解決?
睇過網上話食咩莓既補充劑可以改善陰道健康
會唔會有用?

如果係啱啱好返的話,始終曾經受過感染,亦受過藥物影響,陰道都需要時間去回復以往嘅pH值同狀態,身體分泌亦可能會短暫地比以往少,都係正常架,唔使太擔心。如果最主要係覺得潤滑度不足,可以額外使用潤滑劑, 可以參考下我的之前嘅文章https://www.inmediahk.net/node/1036354,市面上亦有敏感配方嘅潤滑劑,如果係啱啱感染好返可能都係一個比較合適嘅選擇。一般去成人用品店會有多啲選擇,可以按自己需要去買。只於性慾下降,生病嘅時候都會對性嘅興趣同平時有分別都係好常見嘅,加上藥物對身體都有一定影響,一般回復後過一段時間就會去番以往嘅水平架啦。呢段時間都唔需要強逼自己做到同以前一樣,可以逐少地去嘗試唔同親密度嘅行為,等身體同心態都慢慢適應番。

陰道炎多數係由細菌或者念珠菌引起,特別係悶熱天氣或者身體抵抗力差嘅時候容易發生,除咗勤啲清潔同保持陰部乾爽之外,保持陰道本身嘅酸鹼值都係一個改善陰道健康,令陰道益生菌可以持續繁殖同殺菌嘅方法。例如係唔好灌水入陰道去清洗,盡量使用溫和嘅產品(例如清水)去清潔,性行為時使用安全套,同保持日常作息等。

而你所講嘅莓類補充劑,曾經有研究指出紅莓中嘅初花青素對改善尿道健康有幫助,但最近都有研究報告表示其實初花青素係足以治療尿道炎或者預防尿道炎嘅,所以佢嘅效果暫時都未係好確定嘅。因為女性尿道,陰道口同肛門位置上好接近,如果係如廁後清潔得唔乾淨,或者抹嘅方向都有機會令尿道/肛門嘅細菌去到陰道引起感染。所以有時啲人都會話令尿道健康,可以減低陰道發炎嘅機會。但唔同食物嘅效果係唔同人身上都未必一樣,預防嘅作用可能人人唔同,但最起碼佢唔可以取代藥物作為治療功用呀。

1個讚

謝謝你的詳細解答:smiling_face_with_three_hearts:

2個讚