短期旅行需否準備安全套

準備跟剛開始交往約一星期的女朋友去兩三天的短期旅行, 由於交往時間還短, 沒有必需做愛的打算,
但又覺得要攜帶安全套防不時之需, 想請問一下意見.

另, 想同時問一問選購安全套要留意的事, 因為未曾有性經驗, 對相關方面認識不足.

謝謝

對於會唔會發生性行為,其實可以襯呢個機會同女朋友溝通一下,睇下大家對於現階段嘅親密程度嘅睇法同期望,咁就可以避免個一刻先突然發現原來大家期望有差距,亦可以確保大家對於性行為都有共識。至於要唔要準備定安全套,學你咁講,係以防不時之需,亦係對對方同自己負責任嘅表現,都無妨嘅,不過其實大部份國家都應該可以容易買到安全套,如果真係有需要,去到當地先買都係一個選擇嚟嘅。

購買安全套第一件事係要了解自己需要嘅尺寸,唔同國家嘅牌子會有唔同嘅計算方法,歐美/香港常用嘅牌子都係以寬度 (Nominal Width) 【安全套擠扁時橫向嘅長度,數值上海圓周嘅一半】計算,可以量度充血時陰莖根部嘅圓周,再將圓周除二。而日本牌子就多數係用直徑 (Diameter) 【安全套放平時圓形時嘅直徑,算術上直徑 x 3.14 = 圓周】計算, 可以量度充血時陰莖根部嘅圓周,再除以3.14。但有時數字都唔代表一切,安全套厚薄,材質,設計等都會影響實際感覺,基本上安全套感覺緊係好過鬆,只要唔係箍到好緊透唔到氣嘅感覺都無太大問題,要慢慢嘗試先可以搵到最配合自己嘅款式,所以第一次買可以先嘗試少量嘅包裝(例如3片裝)去感受一下。可以參考我哋之前嘅文章了解多啲唔同嘅安全套: https://www.inmediahk.net/node/1035145。另外,配合潤滑劑嘅使用都可以減低性行為可能出現嘅不適感, 我哋之前都有寫過文章詳細介紹https://www.inmediahk.net/node/1036354 。如果之前未試過有性行為,都要好好了解一下正確使用安全套嘅步驟,咁就可以安心地享受性行為啦。