戴套穿咗,仲要月經已經遲咗

我9月21號嚟m, 到今日25號都未見有嚟m嘅徵象,係琴日個肚開始有少少痛, 我有用驗孕棒check 過,一條線, 今日同男朋友唔小心用套個陣穿咗, 我有少少擔心, 我而家應該點做, 食完係咪會影響晒我嘅period? 麻煩晒。。 因為我仲未嚟m所以有啲擔心

唔好意思 想問下點解會穿左嘅?因為想避免同樣件事發生

你一向月經嘅pattern係點樣?大概幾耐一次?因為未必每個人都會每個月同一日嚟m嘅,而且有好多外在內在因素可以影響經期,有時同你預期嘅日期有差距都係好平常嘅事。加上你驗過孕係無事,更加可以排除懷孕嘅可能性。

至於啱啱呢次性行為期間發現安全套穿咗,係可以考慮食事後丸嘅,因為係含有高劑量荷爾蒙,都有機會影響下一次經期,可能會提早或者延遲,亦有人係完全無受影響嘅,所以唔使太擔心。可以去私家診所或者家計會嘅診所見醫生先,等醫生開事後丸比你。不過事後丸要係72/120小時內服用,今次我哋遲咗覆你唔好意思,如果你仍然未嚟m亦擔心懷孕嘅風險,可以去家計會嘅診所諮詢一下醫生嘅意見,評估風險(睇番你月經周期,同埋係咩情況係穿套,你身體狀況等等),睇下有無需要用其他方法(例如子宮環)去緊急避孕。如果唔考慮食事後丸,都可以係性行為後7日驗孕去測試初步會唔會懷孕嘅結果。

安全套可以因為好多原因而穿或者失敗,最常見嘅包括無將儲精囊內嘅空氣擠出;無戴到最底;唔係整個性交過程都戴住;潤滑度不足;用咗唔啱嘅尺寸;使用前長期放喺唔通風或者擠壓嘅環境之下(例如銀包,褲袋)等等。其實只要揀啱呎吋,確保有足夠潤滑,正確咁戴安全套同小心指甲刮到,都可以將安全套穿爛嘅機會減低嘅~