長文 唔好意思 但希望可以有人幫到我
我講少少背景情況先。
我同男朋友發生左半年幾關係，一直都冇咩問題，一個半月前我睇醫生發現有念珠菌，醫生就比左5日塞藥同外搽藥膏比我搽一星期，然後大概都有半個月冇搞到。之後我以為冇事就開始返搞野，都係大概一星期兩次，有套。點知半個月後有次搞完發現流左兩日血，流既量唔係少到一點點，大概似係黎左第四日m用普通護墊都應付到個種，然後過左幾日該月既m都係遲左岩岩好兩日（我好準黎）。m完之後都有搞過兩次，完事都有啲液體流出黎，水狀微土黃色。
於是我再去睇婦科，醫生睇完陰道話冇事，上一次睇醫生照既子宮頸抹片都正常（上面唔記得左講），超聲波照子宮同卵巢都正常，有機會係普通性行為出血冇咩大問題lol, 但話仲有少少念珠菌
所以佢又比左一樣既藥膏叫我抹9日，同一粒塞藥，講話今次應該可以好返⋯但我完成9日之後，今日我搞左次，本來男朋友男上入左一陣間幾舒服，但佢抆一抆返出黎再入就好痛
，大概feel到係頂到好入唔知係唔係子宮頸位，一頂就好痛
究竟係頂太深太大力而痛？
定係念珠菌感染個啲？
抑或係搞太多
完成9日之後，你自己覺得好返未？ 雖然醫生話查9日藥膏，但有時可能要多九日去復原。
今次係咪只係痛，已經無出血？
其實平常人有時都會係性交過程中感到痛嘅，會唔會比自己抖多幾日覺得都好返哂先再試下？可以試下多啲前戲，自己放底會痛或未好返嘅諗法去享受左先。
念珠菌引起嘅不適主要係痕同多分泌物，少啲係會痛。你都九日無搞，平時一星期兩次，又未必係因為搞得太多嘅。三個問題之中，太大力最似會令到你痛，下次試下多啲前戲同埋叫男朋友試下温柔啲，睇下情況有冇改善？
當然你可以再睇多次醫生去確認一下念珠菌好返未。
多謝你睇曬
我覺得好似未好得返曬咁 因為有時抹下面都會望到有好少既白色渣 同少少分泌物 應該再睇多次醫生定再遲少少比啲時間復原再觀察多排？
今次冇血啊 而且啲痛都過左一排冇乜 有機會真係佢太大力撞所以令入面頂位脆弱左 所以都打算休息半個月左右 當復原下
另外我仲想問多少少野
1.婦科醫生有冇好介紹？
2.有念珠菌我喺日常生活中有冇咩真係要注意下？
3.係咪真係會係咁復發冇得斷尾？（包括平時夜訓同壓力大）
唔該曬你
如果你仲見到有白色分泌物嘅話好大機會係未完全好返呀，始終每個人身體抵抗力都唔同，所需要嘅復原時間都會有唔同，加上你提及你生活習慣經常夜瞓同壓力會大，其實呢啲因素都會令身體嘅抵抗力下降嘅。而家嘅你可以考慮下觀察多幾日先， 因為呢度有睇過婦科檢查個陰道子宮係無事，可能只係身體需要多啲時間休息，呢段時間就盡量避免插入式性行為啦。如果到咗今個星期日，分泌物嘅情況而言係無咩改善，就建議再去睇一次醫生啦，可以試下搵另一位醫生，或者要求本身嘅醫生試其他藥物睇下會唔會有改善。另外就係其實男性一樣可以有念珠菌感染嘅，而男性一般會少啲出現病徵，有機會係之前嘅性交當中你男朋友都有少量念珠菌感染，而因為佢係冇食藥，所以即使你好返，只要你哋再性交都會再一次將念珠菌傳播比你。如果會再睇醫生的話，不妨同醫生提起你有男朋友同埋有恆常發生性行為，睇下醫生會唔會開埋藥俾你男朋友食，希望可以令你哋雙方都好返，減少你之後復發。
至於你嘅其他問題：
1）我哋冇特別推薦呀，不過你可以參考下網上其他人嘅意見，唔少網站都係專門俾病人評價唔同醫生或者診所，可以用來做參考。
2，3）其實念珠菌係不論男女，每個人身體都會有嘅，係身體健康嘅時候，呢隻菌對身體係無影響。但只要抵抗力下降，或者天氣變得潮濕悶熱，都會令佢大量繁殖，造成發炎。所以日常生活上除咗令自己有充足休息，保持抵抗力之外，唔好比自己咁大壓力都係好重要架！呢啲都係影響抵抗力嘅因素。同埋有時着得多貼身同唔透氣嘅內褲或者緊身褲都會令陰道位置變得潮濕，令細菌容易繁殖。著啲透氣嘅衣物同埋恆常用清水輕輕清潔外陰都可以有助保持衛生，減少細菌繁殖架～
最後關於你係性行為期間覺得疼痛嘅情況，都唔排除係因為念珠菌未好返而造成嘅。除咗係前戲方面落多啲功夫，可以係性交時配合適量嘅潤滑劑，都有助減低磨擦同不適感架。另外有時性交嘅姿勢都會有影響，有某啲體位會特別容易接觸到你覺得比較敏感嘅位置，可以留意（或者諗下之前嘅經驗）有無邊個體位開會特別痛，嘗試去調整當中你哋雙方嘅位置或者角度，又或者嘗試下其他體位睇下會唔會有改善啊～
2個讚