本人33歲，最近一年發現射量份量比之前減量，以往2日無出貨既份量好可以有一湯匙左右，而家2日無出貨大約得返1茶匙，因為我想生第二胎，其實會唔會有咩影響？真係年紀大啦？
你好呀～好多男性都會在意自己射精既量，不過我諗，真正會去用量杯度精液究竟有幾ml既人就並唔多啦。正正因為好多時候都憑印象，所以可能會出現唔少誤差。綜合學術同官方資料，男性正常每次射精既量係1.25ml至10ml（亦有機構將上限cap為5ml或7ml），至於平均數有人認為係3.5ml，有啲會認為係2ml左右。可以話個range係好大，但average集中係底部。
如果一定要用茶匙（5ml）黎計，1/4茶匙至1茶匙都係絕對正常既量黎㗎。湯匙就一般認為係15ml（不過湯匙確實冇咁標準化），如果真係講緊1xml，反而量太大呀～所以話成人片中男優射到全世界都係精反而係假既，而你既射精情況就正常：D
至於點解會感覺射精既量少左，首先都要睇返你講既「1湯匙」係幾時既事。長期黎睇，精液射出量確實會隨年齡增長發生變化，但亦有研究認為，男性係30歲上下時既平均每次射精量係會達到一世人既高峰㗎～而出現明顯量既減少，可能都要去到55歲打後，所以絕對唔需要擔心自己「年紀大」！
雖然聽落好似無咩新意，但你既身體健康對精液射出量先係好緊要～飲食均衡、作息規律，呢排有無過度食煙、飲酒，呢排有無食過藥物，都會對射精情況造成影響。當然，唔同既病症，例如糖尿病、前列腺方面既問題，亦會有影響，但相信你既情況都屬於正常，更唔需要過度擔憂病症既問題。
相信你既射精量係正常既，但懷孕其實又未必同射精既量有關係。因為始終決定能否懷孕既係精子既質素、數量等等因素，而可能有啲人精液係好少，但其中既精子係好強健。如果有心生b，相信都係懷孕前檢查幫到你多啲喇～價錢就豐儉由人：D