我今年22 已經食咗事前避孕藥5年
食緊 優悅28粒裝
最近開新一包 第一週第2日先嚟m（遲過平時一日 ）
第一週第5日有做愛 無做任何安全措施
但第6、7日都漏食咗 到第二週第1日有少少陰道痛 有粉紅色分泌物 補食返
之後開始有發燒症狀 持續咗3日 第二週第6日有有做愛 無做任何安全措施 同埋輕微肚瀉
今個星期 第三週 第2日開始有微燒症狀 想嘔 同埋下腹痛 陰道痛 好似就嚟m咁
因為最近作息好唔定時 經常通頂 加上漏食藥 有分泌物
好擔心會因為咁有咗 因為5年前試過 依家非常大壓力 想請教一下 懷孕嘅機會高唔高
我有懷疑過 可能係骨盆腔發炎
因為我最近半年一直有陰道炎
依家持續低燒 一縮肚都會痛 同埋應該係子宮痛先啱
但呢個星期無太多分泌物 我都唔太清楚
一般如果連續漏食2日藥，係會建議除咗要即係食返藥之外，係之後7日內如果要發生性行為都要外加安全措施。「第一週第5日」嘅性行為當日你係有食到藥，係之後兩日都無食到。而「第二週第6日」嘅性行為就係距離漏食藥都已經5日，如果你當中個5日都有準時食返藥的話，加上你已經長期服食避孕藥，身體已經適應咗，藥效係會正常發揮嘅，相對上個風險都唔算係太高，不過安全起見，都係性行為後7日同11日驗孕確保一下結果會比較好。
至於你覺得陰道／子宮痛嘅情況，其實建議你盡快去睇醫生！因為你話最近半年都持續有陰道炎，如果有睇醫生食藥的話，但半年都未好返，咁其實可能係其他感染。而且你又提及有粉紅色分泌物，亦會有持續低燒同埋下腹痛等嘅徵狀，都有機會係子宮／盆腔發炎嘅病癥，所以盡早去睇醫生做過詳細嘅檢查會比較好。同埋如果有陰道炎嘅話，其實當建議係好返之前發生性行為，特別係無套嘅性行為，因為病菌有機會係性交過程中傳咗俾你嘅性伴侶，而個啲病菌喺可以對對方無出現感染，但佢嘅性器官上就會染有病菌。係再一次無套性交嘅時候，病菌就有機會再次傳染返比你自己，變相會一直都唔好返咁樣。
你最近作息唔定時，成日要捱夜，都會令身體狀況變差，亦容易會影響情緒嘅。好理解曾經意外懷孕會令你覺得好擔憂好有陰影，不過5年前嘅狀況同現在未必係一樣，而且當時你應該都係啱啱開始食藥，身體都未完全適應，所以出現意外嘅機會亦可能比較高。每一次嘅情況都係會有啲唔同嘅，所以暫時都唔需要太過擔心，我哋會一直陪住你！