啱啱同男朋友做完 有帶套但未射前發現穿咗 冇再繼續 我通常13-15經期 會吾會有bb架
因為你進行性行為個陣係有用安全套，而佢唔係大範圍破裂，其實分泌物接觸到你陰道機率都細嘅，所以你都唔洗太擔心！當然風險都仍然存在，因為男性受性刺激個陣，陰莖通常會自動流出一些透明而黏稠液體（尿道球腺液），當中含有少量精子。即使未射精前已將陰莖抽出，都唔能夠排除精子有遊進入陰道，並同卵子結合嘅可能。只要有一條健康強壯嘅精子同卵子結合就可以導致懷孕，當然，比直接喺陰道內射精嘅數量少好多，但仍然有機會導致懷孕。
所以如果你擔心，可以考慮食事後丸。係香港，事後丸必須由醫生處方，所以建議你聽日可以去私家診所，或者家計會拎緊急避孕丸食。事後丸喺香港係有分72小時及120小時兩種，所以如果你係選擇左食就盡快去睇醫生喇，始終藥越早食越有效果！如果你選擇唔食，我會建議你去購買驗孕棒測試一下。驗孕棒嘅最佳使用時間一般是預計受精時間11天之後。你可以到有信譽嘅藥坊或大型藥妝店購買，店員唔會詢問你嘅年齡。雖然驗孕棒最佳使用時間一般係預計受精時間11日之後，但其實最快可以喺性行為後7日，或預期經期開始個日進行檢驗。你可以買一兩個牌子去驗，如果兩個都係陰性，咁就應該無懷孕喇；或者你可以去醫院驗血，結果都好準確嘅。