增大膏疑問

我想問下增大膏有效嗎?17歲就用好唔好?

你好啊,講增大膏前,想同你分享兩個point先~第一係好多男性會對自己既陰莖長度冇自信、認為自己偏短,但其實佢地多數人長度都絕對係正常!只係俾一啲唔啱既認知誤導。第二係,陰莖長度唔係決定性愛既全部因素,亦唔係要超超超長先可以受到性伴侶青睞!

其實到宜家,對所謂男性陰莖平均尺寸都眾說紛紜,有啲研究認為係勃起後長度達5 inches就係平均 (即係約13cm),不過亦有人覺得短於13cm都好正常,所以唔好輕易覺得自己「small」呀!不過,無論個平均數究竟係幾多,希望你諗吓既反而係:係長度上作咁既比較究竟係咪有意義呢?

有啲男性在意陰莖長度、想大啲再大啲,係因為覺得粗大既陰莖對性伴侶更有吸引力,但性愛並唔係「the bigger, the better」咁簡單:p 無論長度係點,其實好多時決定雙方係咪可以高潮既,反而係你係咪了解對方既身體、夠唔夠貼心、識唔識用啲技巧,加埋環境因素等等。講到白,其實陰莖都只係一件「工具」,最緊要既永遠都係使用工具既人;)都可以舉個例子,以女性黎講,女性通過陰蒂高潮的情況,遠遠多過陰道高潮。所以,就算唔理陰莖長度,只要男性配合得當,都可以令女仔高潮~

講番增大膏或者所謂增大丸,暫時係冇醫學證據可以證明呢類型產品係有效。英國國民保健署(NHS)既專家就曾經好直白咁講,話如果真係有有效增大陰莖既產品,以佢既威力應該已經屬於處方藥物,而唔係求其街度賣。有唔少人言之鑿鑿,話自己用完真係有效增大,但一般黎講,心理作用係其中一個好大既因素。就算真係對某一個人有效,呢啲極少極少既都無足夠充分證明佢既功用。

係陰莖上塗抹膏或油未必係壞事,某程度上,塗抹既過程係會幫助你更加了解自己既身體,有一定既潤滑情況下、唔會整親。亦都可以潛移默化,幫助你養成定時清潔陰莖的好習慣。不過要期待佢可以增大陰莖,實在係期望過高~市面上亦有泵聲稱可以增大陰莖,雖然同樣有人認為自己成功,但其實亦存在唔少風險,因為強力既真空有機會破壞陰莖既軟組織。

希望你睇完呢啲資料,對陰莖長度有些新既諗法~如果有咩疑惑,歡迎隨時搵我地傾呀;)