請問會懷孕嗎

你好啊~好開心揾到你地
如果同男朋友2方都著住內褲磨擦 大家下面全程無直接接觸過 而且佢無射 只係有前列腺液 係唔係一定唔會懷孕?我上一次來m係12月8/9日

其實自己認知&上網睇過 都話唔會有事 但係唔知點解自己仲係好焦慮好擔心 變左種壓力咁

希望可以解答到我啦 感謝你地

求回答 謝謝

Hello 無錯男性係性興奮嘅時候會分泌透明嘅「尿道球腺液」當中係有機會含有精子嘅(「前列腺液」係偏奶白色,屬於精液嘅一部分,主要係為精子提供養分、維持適合精子生存既酸鹼度等,同「尿道球腺液」係唔一樣架),一般如果直接接觸到陰道都係有機會造成懷孕嘅。

不過由於你哋係隔住內褲係體外摩擦,其實首先液體好大機會已經被內褲吸收咗,即使陰部感覺到有啲濕濕地,其實實際嘅分泌物都係無進入到陰道入面嘅,而且即使有少量接觸到陰道口,精子都需要媒介(例如精液)去輔助進入陰道進入子宮,所以以你哋嘅情況,內褲外嘅尿道球腺液係好難可以接觸到陰道嘅。另外就係其實精子係接觸到空氣同其他物質(例如係內褲嘅質地)好快就會死亡,所以即使今次嘅尿道球腺液內有精子,其實係佢接觸到內褲直到有機會接觸到陰道期間都已經會死亡,所以懷孕嘅風險都係非常之低。

好明白有可能會導致懷孕呢件事會為你帶來好多壓力,亦會因為咁樣而覺得擔心。不如趁呢個機會同伴侶商量下日後嘅避孕措施要點樣做,其實即使係體外摩擦都可以使用安全套嘅,咁就可以更加放心。亦可以考慮係用口交膜嚟進一步隔住,相對上都可以再減低懷孕風險架。又或者可以考慮其他型式嘅避孕方法,例如係荷爾蒙避孕法,口服避孕藥或者避孕針等等,都可以令之後嘅親密行為發生得更加安心:relaxed:

多謝你咁有耐性答我:pray:t2:
但都係唔知點解自己會咁焦慮,可能要直至黎m先安心到。

我想問下,如果我上2次月經第一日,係11月4 同12月8, 咁我今個月最遲應該幾號黎?我每次黎大概7日。

唔好意思呀明明理解啲原理,自己心理上都放心唔到,好煩咁:(

唔駛覺得唔好意思呀,好多人都會因為無嚟m而覺得擔憂或者焦慮,係好常見嘅。特別係有「懷孕」呢個可能性,如果未預備好的話,係會令人覺得好唔安心嘅。

如果淨係睇你上2次經期,個週期係34日,如果你一向週期都係差唔多呢啲日子的話,咁今個月就應該大概係1月11日左右會嚟m啦。不過單靠1個週期嘅日子去推斷都未必準確嘅,可以試下下載一啲紀錄經期嘅app,好多都可以計算你過往幾次嘅週期嘅平均長短去推算你下次嘅經期日,你仲可以用個app嚟記錄發生過性行為嘅日子,或者經期之間有咩異常嘅情況。咁之後有咩事都容易啲睇番係幾時發生嘅。但都要記住有好多因素可以影響到月經周期,所以即使同預計嘅日子有差距都係好常見嘅情況,唔駛過度擔心呀!

好明白依家呢一刻可能講咩都無乜用,要真係見到嚟m先會覺得安心,既然係咁不如試下買支驗孕棒驗孕,係性行為後11日去驗嘅結果已經會好準確,咁即使未嚟m都可以令自己放鬆啲先。同一時間可以試下令自己生活充實啲(忙啲!),等自己無太多空間時間去諗多餘嘅嘢,例如約下朋友出街,發掘下有咩新嘅興趣咁。

最後,唔駛怕煩,我哋隨時都係到陪住你架!:yellow_heart::yellow_heart: