好驚有左😭求解答

早幾日同男朋友有親密接觸 大家都除咗褲,但無插入嘅性行為。佢嘅下體喺我陰唇處上下磨擦,並無進入陰道 磨擦左幾下 而男朋友都冇射到 但上網睇資料 知道前列腺液都有少量嘅精子 會唔會漏咗入去 而且唔知自己係咪正處於排卵期 懷孕嘅機率大唔大:sob:

Hello 男性係性興奮嘅時候會分泌透明嘅係「尿道球腺液」,當中係有機會含有精子嘅。而「前列腺液」係偏奶白色,屬於精液嘅一部分,主要係為精子提供養分、維持適合精子生存既酸鹼度等,同「尿道球腺液」係唔一樣架。不過尿道球腺液如果直接接觸到陰道都係有機會造成懷孕嘅。

不過由於你哋係係陰唇位摩擦,實際分泌物量都係比較少,相對上都係難以完整地進入陰道繼而進入子宮。而且精子係接觸到空氣好快就會死亡,所以即使今次嘅尿道球腺液內有精子,其實係有機會進入到陰道期間都已經死亡,所以懷孕嘅風險都係非常之低。

另外排卵期/安全期/危險期呢啲其實好多時都唔係一個可靠嘅標準去判斷懷孕機率,因為要嚟m後先可以計算返大約日子,好難去預測下個月嘅日子等等嘅。而且懷孕率會因為好多唔同因素而影響,身體狀況,甚至體位等都會影響到嘅。

不過暫時睇你哋嘅情況懷孕風險都係細嘅,如果真係好擔心嘅話可以考慮去家計會/私家診所見醫生拎事後丸,或者係性行為後7-11日驗孕。其實即使係體外摩擦都可以使用安全套架,咁就唔使之後心掛掛。除咗安全套,都可以考慮下用口交膜嚟隔住,相對上都可以再減低懷孕風險架。又或者係其他型式嘅避孕方法,例如係荷爾蒙避孕法,口服避孕藥或者避孕針,都可以令之後嘅性行為發生得更加安心!

啱啱今日嚟咗M 不過有啲似係假月經
想問下假月經代表咩 同懷孕症狀有冇關聯
有假月經可唔可以代表100%冇懷孕:question:
求解答:sob:

一般人哋講嘅「假m」其實係指著床性出血,意思係受精卵係子宮壁著床後會出現嘅出血情況。不過,首先呢個情況並唔常見,而且亦唔會好似月經咁持續性出血。如果你而家嘅月經狀況同平常嘅差唔多,咁基本上都可以排除係著床性出血嫁喇~其實你哋嘅情況會懷孕嘅機會率係近乎零,不過如果你嚟咗m但都仲好擔心懷孕嘅可能性,不如買支驗孕棒測試下啦,係預計會來月經嘅時候驗已經會好準確,更何況你已經係嚟緊m,咁就唔使估估下啦。

但其實本身都係月頭4-6號呢段日子嚟M
好驚 唔知點算好。

其實同你預期嚟月經嘅日子都吻合,無遲到,更加可以證明你係無懷孕。知道你好擔心可能會懷孕,覺得唔知點算好,如果而家屋企附近仲有個人護理用品店/超市未閂門,不如直接去買支驗孕棒,返屋企測試(如果打算而家驗的話,記住要揀唔需要用晨尿嘅牌子呀!),咁就可以令自己安心啲啦。同一時間,你覺得擔心懷孕呢件事有冇同男朋友傾下?或者有佢嘅陪伴同支持相信都可以令你安心啲!

要記住,你哋今次性接觸嘅風險真係非常之微,要造成懷孕係一件好難嘅事,加上你已經準時嚟咗月經,基本上已經可以排除懷孕嘅可能性,而家只差一步就可以確認自己係冇懷孕。你而家唔係無嘢可以做架,只要驗埋孕就可以放低心頭大石,好好咁訓返一覺唔駛心掛掛。試下俾個獎勵自己,例如係自己鍾意食嘅甜品,係買驗孕棒嘅時候順便買埋,一驗完就可以得到呢個獎勵,等自己有多啲動力去驗孕。

唔使擔心,無論有咩事,都有我哋係度陪伴同支持你架!!

好嘅唔該晒 另外長氣問一問
假M有冇機會係原本經期嘅時間發生
唔知係咪因為今日係第一日嚟M
冇乜感覺 而且血量同顏色 都好似比之前少同淺
唔知係咪心理作用:pray:t2:

今朝起身再睇 情況真係唔似平時月經:pray:t2::sob:

同埋假月經有冇可能係精神壓力太大休息不足而造成?

因為今次嚟M嘅顏色同量 都同平時好唔一樣
變得好少同變做深啡色
但會唔會因為我呢排考試休息少
加上因為呢件事而緊張導致?
另外驗孕方面 係咪我依家隨時可以驗?
因為我見人地話要遲經先驗
但我依家都唔知自己係真M定假
同埋假M嘅日子係咪一般都會得一 兩日?

可唔可以大概解答到我依家嘅狀況
到底係真定假M

Hello 見到你都開咗另一個post問,不過都係度回覆返你其他問題先!

休息少同太大壓力都係可以令月經出現變化嘅,因為呢啲因素都會令身體狀況變差,月經係由賀爾蒙控制嘅,當身體狀況有變化嘅時候,荷爾蒙嘅水平都會因而出現變化,所以都唔需要太過擔心。驗孕的話,係性行為後7日驗已經會有初步結果,而係11日後或者預計嚟m嘅日子去驗結果會更加準確,所以你而家而家嚟咗月經之下去驗,結果係會相當準確架啦!

假m/著床性出血一般月量都好少,有機會只係得幾滴或者護墊能夠承載到嘅份量左右,而且唔會持續出血。老實講,如果真係懷孕而受精卵著床,如果連續出血幾日都唔係一件正常同係好危險嘅事嚟,所以「著床性出血」係唔會好似月經咁長期持續出血架。只要你連續幾日都有血,基本上都可以排除懷孕啦。加上你哋本身性接觸嘅懷孕風險係非常之低,所以總合各種情況,你係無懷孕嘅,買支驗孕棒令自己確認結果啦!記住用驗孕棒嘅時候要按照盒內嘅說明書去進行測試同睇結果啊~