我一位男仔，我同女朋友都只係係出面磨，我覺得自己冇射，但係我女朋友就俾我搞到好濕，我驚會有咗。真係好驚，我要點算好。
我好後悔，我唔應該做啲咁嘅嘢。我而家驚會有前列腺液，順住我女朋友啲水入咗去，結果有咗
其實男性係性興奮時分泌嘅透明液體係「尿道球腺液」，當中係有機會含有精子嘅。而你所講嘅「前列腺液」係偏奶白色，係屬於精液嘅一部分，同「尿道球腺液」係唔一樣架。不過尿道球腺液如果直接接觸到陰道都係有機會造成懷孕嘅。
係體外磨擦而且無射精其實實際嘅尿道球腺分泌量係比較少嘅，而且係體外亦相對上難以完整咁將精子帶入陰道同子宮。而且精子係接觸空氣後好快會死亡，所以即使後來有機會滲入陰道，尿道球腺分泌內嘅精子都好大機會已經死亡，所以今次嘅性接觸會懷孕嘅風險係非常之低嘅，唔駛太擔心。
雖然風險好低，但聽得出你好擔心女朋友會唔會懷孕，亦覺得好後悔，而家可以你做嘅 係
1）睇下女朋友對今次事件嘅睇法，如果對方都覺得好擔心，可以一齊去家計會診所／私家診所見醫生，睇下身體狀況適唔適合食事後丸，等醫生開藥 。不過事後丸係有時限嘅，最耐要係性行為後120小時服用到，所以如果決定咗就盡快去睇醫生啦。
2）係性行為後7－11日驗孕，係普通個人護理用品店就可以買到驗孕棒，跟住盒內嘅說明書去做同睇結果，兩個人係屋企都可以處理到嘅。
3）趁呢個機會同女朋友商量之後嘅安全措施安排。即使係非插入式嘅性行為其實都可以使用安全套嘅。亦可以考慮用口交膜嚟隔住，或者係其他型式嘅避孕方法，例如係荷爾蒙避孕法，口服避孕藥或者避孕針，咁之後嘅親密行為都可以發生得更加安心！
其實有性接觸，有性慾都係好平常嘅事，希望你唔會因為今次而對「性」感到罪惡感或者內疚感，或者係一件好差嘅事。無論係任何型式嘅性接觸，只要做足安全措施都係絕對冇問題嘅。不過，如果討論後你哋都係決定唔做安全措施，咁就要諗清楚自己係咪承擔得到可能會出現嘅後果，如果大家都覺得ok的話，咁呢個都係你哋二人有共識之下做嘅決定嚟，都係冇問題嘅。
好多謝你既答覆。我想問下你話直接接觸，咁我係出面磨，算唔算係。我知自己係冇諗過後果就去，所以搞到自己日日都好驚，但係聽到你話機會不大咁我都放心啲。我而後會做好防護措施。
通常直接接觸都係指陰莖有進入到陰道嘅情況，你哋今次係陰道外磨擦都唔算係直接嘅，所以都唔需要擔心呀。 不過，雖然風險唔高，但現時都無任何避孕方法係可以做到100%安全，體外摩擦亦一樣，好好同伴侶商量下之後嘅安全措施要點做令風險降低啦～