睇完Netflix套紀錄片對子宮環好有興趣,好似成效高又安全咁,但有好多疑問:
-
佢有分2種,一種係釋放荷爾蒙,一種釋放銅質,兩種避孕率是否一樣?
-
銅質冇荷爾蒙係咪安全啲?因為我食避孕藥2-3年了,擔心身體問題,唔想再用荷爾蒙去避孕,但上網睇,香港係咪冇銅質個隻做?
-
安裝子宮環係咪好痛?紀錄片啲人形容到好痛,網上又話會開止痛藥去做,同做子宮抹片感覺大唔大?
-
見佢話有機會刺穿個子宮,假設刺穿咗,點拎返佢出嚟?會唔會好大工程?
-
荷爾蒙個隻會令人月經停止,咁銅質個隻會唔會?
-
香港有冇邊間做會安全啲?上網見人講家計會做麻麻
-
價錢大約幾多㗎?
-
安全度同避孕率,係咪子宮環好過避孕藥?
-
香港好似少人做,安全性會唔會有問題?(紀錄片有個case係條線太長,搞到染性病)
好多問題,因為對呢樣嘢比較陌生
好好奇,希望有人可以解答到,謝謝~
你好呀~好欣賞你對唔同既避孕方法都好open-minded,亦好認真咁去搵資料~下面分享一啲有關既資訊,希望我地可以一齊探索;)
-
兩種子宮環(下面統稱IUD,不過荷爾蒙子宮環亦有人會專門叫作IUS)都可以保證99%以上避孕成功率,可以話係避孕方法中既top tier。好少有研究會將呢兩種IUD既避孕成功率作比較,曾有一項研究顯示,荷爾蒙IUD既成功率會更高。但因為差別並唔算significant,有關既研究亦並唔係好足夠,所以實際使用上都會將兩種IUD視為同一類型。值得提及既係,銅IUD可以用作緊急避孕,唔安全性行為後最長5日之前都有效!但荷爾蒙IUD就唔可以
-
兩種IUD其實主要既副作用大致係相同既,例如令骨盆腔發炎既機會增加少少、身體有機會排斥,等等。分別就唔大,但對黎m既影響係唔同既(第5問有講到),另外手術前對身體既要求有少唔同。特別想提下,荷爾蒙如果劑量得當,都唔係壞野黎既。例如因為有荷爾蒙,所以荷爾蒙IUD可以控制m血量唔係咁多(對於貧血既女性就好有用),亦可以降低子宮內膜癌既風險。無論你偏好邊一種,都不妨同醫生傾下:)
-
置入IUD同子宮抹片既過程都好唔同,前者確實有機會感覺到痛,但並唔係難以忍受既痛。因為要將金屬鏡擺入陰道,呢個過程就有可能唔舒服,此外IUD真正置入子宮時,亦會唔少人感到唔適應,可能會引起m痛果種痛感,或者更強烈,所以醫師會開止痛藥都係普遍既情況,亦有可能會局部麻醉
-
IUD移位就有可能造成刺穿子宮,雖然機會好微,但都係需要認真考慮既風險。如果真係造成刺穿,首先需要移除IUD,跟住醫師會評估你刺穿既程度有幾嚴重,可能會需要對受傷組織進行手術,更嚴重既話可能需要多次手術。但呢種風險唔係完全冇得避免,因為置入IUD後,其實平日你係可以用手指探入陰道去檢測位置所在,如果無移位,係可以feel到IUD下部果條線。而如果你發現自己探測唔到,或者下腹開始有明顯痛感,都可以及早睇醫生!
-
荷爾蒙IUD既荷爾蒙同多數避孕藥係同一類型,因此都係會令到m血量更少,甚至有機會停經;銅呢隻反而可能令m血量更加多,尤其係開頭3至6個月;亦可能會令到m痛更加嚴重,或者m期不規律,但隨身體適應會慢慢好返
-
其實做得手術都會係有一定保障㗎~至於邊間好,好多都係個人意見:P
-
公立方面,家計會兩隻都有,健康院就只有銅IUD。家計會提供既IUD價錢由$300去到上千都有,手術費就同一類型$150
-
一旦確認你既身體啱用,IUD同避孕藥都可以算係非常安全!究竟邊一種更加安全就好personal~最緊要係用之前有同醫生傾過,確認你既身體情況。相較避孕丸,IUD既風險種類算係比較多,但機會都好細微,例如:若避孕失敗,身體內有IUD就有早產或流產既風險;都有少部分女性置入IUD後,有機會生卵巢囊腫,等等。
-
雖然IUD係香港未似國外咁普及,但每年亦都有唔少女性去做㗎,而手術技術都幾成熟~手術中安全性基本都有保障,往往係手術後既風險比較需要留意