我由十二月開始食緊yaz避孕藥，月中發生性行為之後就小量出血左兩星期，月尾食到白色個四粒無效藥，停左一日出血，再流返小量嘅血，想問下月尾出血算唔算月經，同埋食左避孕藥就有頭暈、反胃、作嘔等等副作用，同埋想問下會唔會有左？
性行為有戴安全套
首先如果你性行為期間有帶安全套再加上有食避孕藥，會懷孕關嘅可能性係非常低嘅。至於你所講嘅頭暈、反胃、作嘔等等都係初期服用避孕藥嘅常見副作用嚟，唔駛太擔心，亦同懷孕無關係嘅。不過如果呢啲症狀一直持續，就最好話返俾當初開始服藥前諮詢嘅醫生知，始終避孕藥有唔同牌子，每隻含有嘅荷爾蒙同埋劑量都會有分別，出現過大嘅副作用有機會係身體唔適應，可能需要試下其他牌子。
而出血嘅情況，其實有唔少女性係啱啱開始食避孕藥嘅時候都會有類似嘅情況出現，因為身體都需要時間適應有額外嘅人造荷爾蒙進入體內，代替本身自然嘅規律。至於睇番你講嘅情況，應該月尾（食緊無效藥）嘅時候嘅出血先係月經嚟嘅。如果而家出血嘅情況都已經停止咗，就唔使太擔心呀，比啲時間身體慢慢去調節。不過如果過多一排又再次出現非經期出血嘅情況就最好去見下醫生啦。
除此之外，有時性行為期間過度嘅磨擦都會令陰道出現細小嘅傷口，因而有出血嘅情況。之後性行為都可以留意多啲潤滑度嘅情況，額外用返潤滑劑，咁都可以避免受傷同令過程更加舒適嘅！