我試左好多年，通常隔一兩星期會同男朋友試一次，佢用手指/jj入。但我好驚張開進腿比人入，覺得好可怕，驚到佢一用手指放係我陰道口，我身體會不自覺起勢掙扎…
就算入到，都係我合埋哂隻腳然後佢手指入黎，入到一個手指頭左右。我唔係冇性慾，但比條外物插入黎既感覺，原來我真係唔享受…
我到底可以點做？
Hello 唔好意思咁遲先回覆你！男朋友願意陪伴你慢慢嘗試，睇得出你哋嘅關係真係好好，好珍惜同尊重對方。其實有好多女性都唔係一時之間就接受到有物件進入陰道架，所以都唔需要覺得自己係有問題。我哋都想了解令你覺得恐懼嘅原因係咩，見到你話當對方一用手指放係你陰道口你已經會覺得好難受唔想繼續落去，當時你嘅腦海中會諗緊咩，或者有無咩畫面片段漂過？每個人對於「性」都會有唔同嘅感受，而人係成長過程中，特別係啱啱接觸同性相關嘅事物嘅時候，接觸過嘅資訊都有機會影響到自己對「性」嘅諗法或者感覺嘅。如果係初期接觸過一啲比較深入／誇張嘅情節，都有機會令自己對俾插入產生恐懼感。可以試下回想以前有無試過睇過一啲「被進入然後對方表情好痛苦」嘅畫面，聽過朋友嘅經歷，甚至係睇過電視劇／媒體嘅情節？如果我哋可以了解到令你覺得恐懼嘅原因係乜，咁都可以更加針對地嘗試幫你面對／適應佢！
同一時間，見到你話自己其實唔係冇性慾，都想了解下你本身有冇自慰嘅習慣，特別係有冇嘗試過自己用手指／玩具插入陰道？係嘗試陰道性交之前，其實都可以考慮下係「刺激陰蒂」上探索多啲先，因為其實大部份女性會感到高潮都係透過刺激陰蒂，應該陰道。係高潮過後亦容易令自己更放鬆，可以更準備發生其他形式嘅性行為。除咗可以自己探索下，都可以請男朋友由刺激外陰開始落手，令陰道習慣有被接觸嘅感覺，咁樣之後如果再有插入式嘅行為，陰道都可能會無咁抗拒。
其次，見到你都好怕要張開腳俾人進入，其實可以試下由自己主導呢件事，例如係自己嘗試放自己／男朋友嘅手指入陰道，當呢件事係你可以自己控制嘅時候，一有唔舒服嘅感覺你都可以即時停止，亦可以調較角度同深淺。市面上亦有一啲性玩具／陰道訓練工具，例如 https://www.lesplayhk.com/product-page/wellness-醫療級陰道擴張器套裝 ，通常都會有唔同尺寸，質地亦係比較軟熟嘅。佢哋係手指以外，自己練習／適應嘅好幫手。由比較細嘅size開始，如果慢慢習慣到自己控制嘅陰道插入，之後或者都可以再去嘗試其他形式，例如係由男朋友主導嘅動作，可能對你嚟講會容易啲接受呀。
仲有呢，係進入陰道嘅時候都可以配合返潤滑劑！本身有好多女性嘅分泌物量都係唔足夠應付性行為嘅，同high唔high／愛唔愛對方無咩關係，而係緊張嘅情況下分泌物嘅數量亦有可能進一步減少，加上可能你哋每次嘗試都會需要一啲時間，選擇持久水潤嘅潤滑劑都有助減低過程嘅不適感架。
知道呢件事為你帶來好長久嘅困惑，不過「性」往往都唔係可以速成嘅，好多時都需要一啲時間去探索，係過程中你亦可以更認識同了解自己對「性」嘅期望同需要係咩。慢慢嚟啦，唔好迫自己一定要一下子就進入到狀態嘅。而且，每個人身體構造，感官感受，同對「性」嘅經歷都好唔同，唔需要強行同其他人／影片嘅主角做比較，我哋大家都係獨立嘅個體嚟架嘛。你已經好努力架啦，欣賞你！
1個讚