M唔肯嚟,點算?

我啲m平時都好唔準,之前試過17日就嚟,最多試過36日,但係今日已經44日都係唔嚟。四個半月之前發生過性行為,事後26日都有用驗孕棒驗過冇事,之後m都有按時嚟,但係依次已經遲左好多,仲會唔會有左?

首先可以排除懷孕嘅可能性,因為你對上一次發生性行為以經係4個半月之前,係事後你亦驗過係冇懷孕,之後幾個月你亦有正常嚟m,所以你一定唔係懷孕,唔使擔心!

至於點解今次未嚟m,你提到自己本身月經都唔係太準時,所以暫時都唔需要太擔心嘅。加上月經本身可以被唔同內在同外在因素影響到:病過食過藥,太大壓力,生活習慣有改變等等都可以令月經日子有變動。可以試下download一啲紀錄經期嘅apps,咁就可以睇到自己大概週期嘅規律,亦可以利用apps內計算嘅平均數去推斷月經幾時會嚟。

如果你覺得月經唔規律對你嚟講好困擾,可以考慮下服用口服避孕藥,有唔少人都係為咗令月經變得規律啲而食嘅。可以去家計會診所約見醫生/護士,佢哋會了解你嘅身體狀況同病歷,再去分析你適唔適合服食,或者適合邊一款嘅藥物,希望令情況有改善!

唔該晒你既回覆,但係因為依排考試,好難唔熬夜,除左食藥之外,係咪食啲涼嘢都可以催m㗎?或者可以食啲咩等佢快啲嚟?

如果以西醫科學角度嚟講,「食寒涼食物會令月經快啲嚟」係無研究可以證明得到嘅。而且每個人體質都唔一樣,貿貿然食一啲寒涼嘅食物可能會身體承受唔到或者有其他反應(例如肚瀉等等),所以安全起見都係唔好咁做啦,除非你先去尋求中醫嘅專業意見,睇下你嘅體質如何。

經常捱夜都係其中一個令月經變得唔規律嘅可能性,因為休息時間少咗,相對身體嘅抵抗力或者內分泌都會有變化。除咗食藥之外,最自然健康嘅做法係盡量比自己多啲休息,令身體盡快回覆平衡。不過知道因為考試可能都好難可以有充足睡眠,不如試下由飲食著手,係日間嘗試食得健康同均衡啲,同時放鬆心情,因為太大壓力都會影響月經架!

你好呀,因為我日日都習慣飲1-2杯齋啡,唔知過多既咖啡因會唔會導致m唔準呢?thanks!

今日第48日啦:cry:好驚,係咪真係100%唔會有左?

你驗過孕係無懷孕嘅話基本上就可以排除懷孕嘅可能性啦,加上你對上一次性行為係4個月之前,如果真係懷孕應該已經會有其他懷孕象徵出現,亦唔會係過往4個月都有月經,所以你係無懷孕架啦,不過你都可以選擇在驗一次孕咁就可以令自己更加安心!未嚟m真係可以有好多原因嘅,加上你本身月經週期都唔太穩定同偏長,所以都唔駛太擔心呀。至於每日一兩杯咖啡,如果係你一直以嚟嘅習慣,唔係最近先開始嘅,基本上對你身體嘅影響都唔會係即時/近期,所以而家未嚟m應該係唔關咖啡事架~