小便嘅問題

我係男仔 小便嘅時候有時(大概50%機會)會分叉 有時控制到有時唔得 陰莖包皮上有啲唔痕,唔凸嘅白色粒粒(都有咗一段時間) 請問係咩事

小便分叉有好多原因引致嘅,如果只係偶發性,間唔時先會有,有機會係因為尿道有突然嘅阻塞,例如係因為自慰或射精後有少量精液/分泌物殘餘,陰莖未係充血後完全變回自然狀態而令尿道受壓,或者朝早訓醒因為夜晚膀胱有尿液積聚而受壓令尿道形態有短暫改變,不過呢啲情況都會係短時間之內回復。不過如果係長期發生,例如無論咩時間(特別係以上無睇過嘅情況下)去小便都試過分叉,就有機會係因為尿道炎,有尿結石或者前列腺發炎等泌尿系統問題啦。如果情況令你覺得憂慮,或者係小便時會有疼痛感或者有血尿,就要快啲去睇醫生做詳細嘅檢查啦!

如果唔痕唔痛同埋無分泌物滲流出來,有機會係珍珠疹嚟,係屬於良性嘅血管纖維瘤,好多男性都會有,通常都會生係比較接近龜頭或者冠狀溝(龜頭同餘下陰莖中間條罅隙)嘅地方。珍珠疹唔係由細菌或者病毒引起,對身體亦無影響,有啲人過咗一段時間之後會自然冇咗,亦有啲人唔會,所以都唔需要擔心呀。不過如果之後有其他異常變化,例如發炎或者流血等就要快啲去睇醫生啦。