我同女朋友係23號4-7點有進行兩次性行為 但係無用到套 都係體外射精 但係睇返資料發現射前分泌嘅都會有精子 而佢根據app預測嘅排卯日係26號 有事嘅機會係咪好大 真係好驚會有咗 如果食事後丸 副作用會好大？ 女朋友嘅身體一向比較弱 佢會唔會承受唔副副作用嘅痛苦？
同埋，依家係新年假 家計會係咪會唔開 咁咪會錯過咗120小時個期限 咁點算？我地係學生嚟嘅 真係唔知點算好 可以係藥房買藥？希望可以幫幫手 好無助
你好啊，唔知你地最後有無採取措施呢？正如你所講，無用套就算體外射精都會有懷孕風險。雖然你女友預測排卵日係26號，但真正排卵日有可能因應女仔身體狀況而提早或推遲，因此23日都唔安全。家計會公眾假期休息，所以最理想既情況係搵私家診所，女仔睇過醫生後拎處方藥（事後丸）。而藥房就買唔到、亦唔應該買到事後丸。
另外你問到是否「好大風險」，無套體外射精既懷孕風險絕對存在，係咪「好大」就見仁見智。有研究顯示，100名用體外射精方法避孕既女仔中，第一年會有22名女仔「中招」，係有超過兩成既失敗率，但亦都意味你女友唔一定懷孕呀（當然我地唔建議每次都抱著咁既冒險心態：P）。
一般事後丸分72小時同120小時兩種type，後者比較常見。錯過期限就會無效。係你既case，最好係今日下晝3點前，有拎到果隻120小時既事後丸食。但如果你地錯過呢個期限，亦都唔代表完全冇得補救～！依然好建議你地試著打電話俾家計會或者睇私家，傾下自己既情況。相信姑娘同醫生都可以俾到你建議，同埋都可以幫助你track你既情況，亦令你同女友更加放心。最後，無論遇到咩情況，希望你都唔好驚慌，有好多人都會係度幫助你：）加油～