好擔心?應該點

前排同男朋友第一次做
由於我擔心會黎m
所以我食左停經藥
食左4日
做左兩日愛愛之後又食左低劑量既避孕藥
做既過程有带套 外射
我依家過左一個禮拜都仲未黎
但有谷m既徵象 個胸痛 外圍 有時會m痛
有生瘡 有少量白带 有時係透明
有時係白白地黃黃地
我應該點?

你指的停經藥是咩藥, 避孕丸?

係norcolut同埋美意避

Hello 你所食嘅其實都係口服嘅避孕藥嚟,係要長期準時每日服食先至會有效果嘅。即使係為咗調節月經,其實都係需要係上一次經期就開始食先會穩陣地做到效果,而且係服用到避開你唔想嚟m嘅日子之後就要停,等經血排出。你嘅情況係食咗4日藥之後,有2日發生過性行為,之後又再食避孕藥,其實呢一連串食藥嘅舉動對於避孕或者調經都係無太大嘅幫助嘅,因為唔係持續性咁食藥。不過你哋發生性行為期間係有帶安全套,所以基本上都冇咩懷孕風險嘅。

而點解未嚟m,除咗因為本身月經係好容易受唔同因素影響,亦好容易唔規律,要睇番你本身自己嘅月經週期之外,你始終都有食過幾日含有荷爾蒙嘅避孕藥,一樣有機會影響到體內自然嘅荷爾蒙分泌,從而影響到月經。你所講其他嘅生暗瘡,有白帶等都有機會係因為荷爾蒙有改變而出現嘅。

如果你肯定你地發生性行為嘅時候係有正確咁使用安全套,而且無穿漏,咁就可以排除懷孕嘅可能性,月經日子有改動係好常見嘅事嚟,唔需要太擔心。但如果你唔肯定之前嘅性行為係咪安全,都可以係性行為後起計7日驗孕,咁就會有一個初步結果架啦,而係第11日後驗結果就會更加準確。

其實食口服避孕藥嘅避孕率係相當高嘅,亦可以調節經期,不過就需要好規律咁去食,唔可以係性行為前後先食,咁樣係無效果嘅。如果之後都想用呢個方式去避孕,不妨去見見醫生,但佢哋評估你身體狀況適合邊一隻藥物啦。可以考慮去家計會嘅診所,買避孕藥嘅價錢亦會被市面平啲,又有醫生護士嘅意見。