上次黎m最後一日係1/2，跟住上次sex係7/2，有用到套既，但是14/2號有小量血，當日都有驗過係negative，不過唔係晨尿，呢兩日都有流啡唔係血，唔知係咪排卵期出血定咁，呢四個月週期係33-35，但上個月早左係29號，所以唔知今個月週期準唔準，所以唔肯定排卵期係幾時，預計嘅話就係呢幾日，係排卵期出血定著床血，有啲擔心，腹部只有少少痛，胸部冇脹，求解答
就你嘅情況去睇，懷孕嘅機會唔大阿，因為驗孕棒嘅準確度都好高，所以都幾肯定你所講嘅啡色分泌物唔係著床出血，唔洗太擔心
不過因為單睇你嘅情況難以判斷係唔係排卵期出血，為左健康著想，都建議你去睇醫生了解返身體狀況。
今朝起身嘅時候再驗過一次，都係negative 所以都放心左少少，排卵期出血我四月試過一次，但係嗰次血量多啲，呢次幾日都流啡，正常排卵期出血幾日會停，咁樣計今日已經第四日，唔係著床血嘅話係身體出問題？不過腹部冇咩特別痛楚
上次性行為係11日前，所以依家嘅驗孕結果都會好準確嘅。驗左兩次驗孕棒結果都係negative的話，就真係可以放心啦～
加上著床性出血通常唔會連續好幾日出現，多數係少量同一次性。
見你以前試過排卵期出血，依家都應該唔洗太擔心嘅
不過如果你已經試過排卵期出血，而且持續一段時間，都建議睇你醫生，做番個個婦科檢查，確保子宮卵巢等部分係無事
1個讚
Hello 我週期係35日左右，應該星期日1/3黎（當日有驗孕）但到今日2/3都未黎，所以我有啲擔心呀！我最近一次性行為係20/2，有帶安全套，但我經常有帶安全套都會擔心懷孕，有咩方法可以放鬆啲心情，我有諗過食避孕藥，但係我又唔知點去家計會配藥，求解答
Hello 睇番你之前分享嘅資料，你一向經期都係33－35日左右，而上個月都試過早咗嚟，其實月經係好容易被唔同因數影響到而有改變架，例如情緒，壓力，或者病過等等，而特別係最近大家可能都少咗出街，亦可能唔使返工返學，係屋企嘅時間多咗，有時候訓覺同起身嘅時間都會同以往唔同，變相係打亂咗以往嘅生理時鐘，呢個都係其中一個好容易影響月經嘅原因嚟架！而且女性月經週期有變化係好常見嘅事，好少人真係每個月嘅日子都一模一樣架～
再加上你哋最近一次性行為係有使用安全套，亦有係之後驗過孕，結果亦係陰性，1／3係性行為後10日，亦係預計月經日子，當日驗孕結果係相當準確嘅，相信係可以排除懷孕嘅可能性架啦。呢件事可能亦令你產生咗唔同嘅情緒或者擔憂，呢啲都係可以影響月經嘅，既然排除咗懷孕嘅可能性，就嘗試放鬆下心情，調整一下生活習慣，相信好快就會嚟月經！
至於你講擔心安全套唔能夠完全避孕，其實的確無方法（除咗唔發生性行為）係可以做到100%避孕，安全套亦會有出現意外嘅機會率，特別係當唔係正確地使用，唔足夠潤滑，揀咗唔識合尺寸等等，都有機會造成破裂，減低避孕效用，如果你都考慮過食避孕藥，其實呢個都係一個比起安全套有更高避孕功效嘅方法嚟，但問題係每日都要定時食藥，如果你覺得都適合自己嘅話其實去家計會預約見醫生就可以架啦。你係26歲以下的話就需要打去青少年診所個邊預約 （https://www.famplan.org.hk/zh/our-services/clinic-services/youth-health-care/content） ，同姑娘講係想做食避孕藥就ok架啦。如果超過26歲就係營業時間內直接上去有婦女服務嘅診所（https://www.famplan.org.hk/zh/our-services/clinic-services/women-health/women-health-service/content） 就可以架啦。去到診所會見護士同醫生，會同你做啲簡單嘅身體檢查，同埋問下病歷，之後就會按照你嘅身體狀況建議你可以選擇嘅牌子，第一次只可以配3個月嘅量，亦會同你約期返去覆診確保你身體狀況ok。過咗覆診冇問題就可以配多啲月份嘅藥物架啦，期間如果有咩唔舒服或者突發情況都可以隨時打返去診所預約檢查嘅。除咗口服藥物，你可以考慮避孕貼或者打避孕針，家計會都有提供，可以見醫生嘅時候問下適唔適合自己嘅身體狀況。
除咗食藥，亦有唔少人係會食藥+安全套同時使用，將避孕率更進一步提升，我哋之前亦有不過片段教學點樣先係正確使用安全套嘅方法，亦有介紹唔同潤滑劑點樣可以配合安全套，呢啲都係可以保障安全套功效嘅方法嚟架，係我哋Facebook Instagram都有得隨時重溫！
希望唔同嘅資料會令你了解多啲唔同避孕方法，亦會因此而覺得安心啲。只要有盡咗努力去預防，你已經做得好好架啦！唔駛比太大壓力自己呀！
5/3今日已經係40日la,我從來未試過超過42日架，如果過多兩日仲未嚟，係咪需要去睇醫生呀
。即是我check過好多次係negative,但一日唔黎M都放心唔到
其實你睇返自己過往嘅週期日子或者都會發現其實個數字係可以有好多同好大變化，試過3x日又試過42日，真係有好多因素可以令月經出現變化嘅，所以原則上今次週期數字如果比起以往有變化，甚至長過你最長嘅紀錄42日都未必係一件好嚴重嘅事。
不過，我都好理解你多次驗孕理智上知道結果係冇懷孕，但只要一日未嚟m都唔會放心得落嘅心情，如果你覺得42日呢個數字係你暫時心中可以最大接受到嘅週期長短，過多2日都未嚟m的話可以去睇醫生檢查一下嘅。醫生一般會問下你病歷，你過往經期，最近嘅性行為頻率，亦好大機會會同你再驗一次孕，之後會同你做一啲簡單檢查，初步睇下身體有冇咩異常嘅地方，特別會留意你下腹、子宮嘅狀況。如果一切都正常嘅話，醫生可能都未必做到啲咩，有啲醫生可能會建議開一啲荷爾蒙藥物比你食，幫助你調節體內荷爾蒙水平，睇下會唔會令月經快啲嚟。如果檢查期間發現有啲咩異常，醫生都可以會幫你抽取分泌物／組織去化驗，或者轉介你去婦科醫生做更進一步嘅檢查嘅。
希望呢啲資訊都會幫到你做決定，呢兩日就嘗試令自己放鬆啲，保持比較健康嘅作息同飲食啦～希望你快啲嚟m！！！
1個讚
上次問完，中間嗰兩個禮拜冇去諗㗎啦，但係就快35日嘅時候，諗住自己就嚟嚟M，但係冇嚟，所以又擔心返。其實我都唔想成日諗，但係真係控制唔到自己去諗，始終一日唔黎都放心唔到。睇返我一年記錄，真係未試過過42日，唔知係咪呢排冇返學，個作息唔好,所以有影響啦，係咪貧血都有影響㗎？ 不過點都好都唔該晒你哋咁多位解答我嘅問題同提供意見，我都希望過多兩日我真係嚟M la