過多一兩年就完青春期,但胸部都唔長肉咁,可能因為自己係瘦底關係。雖然知道遺傳係其中一樣重要因素,亦都唔應該強求,但係都係想可以身材好啲。請問有咩天然的方法可以令上圍豐滿啲呢?之前食過豐胸丸都無咩用咁
你好呀!其實都睇到你對自己嘅胸部唔太滿意,但係正如你所講,胸部大細的確受到遺傳影響。但係後天嘅因素例如營養嘅吸收、運動等等都會同發育有直接影響。至於胸部發育其實同荷爾蒙分泌有關,而每個人分泌荷爾蒙嘅情況都未必一樣。乳房嘅結構大部分都係脂肪組織,如果想自然地淨係豐胸而其他身體部份唔肥其實係好難嘅。睇到你話食豐胸藥,提返你要小心呀,市面上嘅豐胸藥成份唔清楚,亦唔一定可靠,對身體會有嘅副作用對每個人都唔同,仲有始終係藥物,係無醫生專業意見之下自己去買藥食唔係太安全啊。
如果真係想自然啲去增加上圍嘅,除咗靠增肥(但附帶條件係成個人都會肥)都可以試吓透過按摩乳房,特別係乳腺同埋淋巴位,因為好多女性呢啲位置都會有堵塞,(俾少少力按落去會覺得冤冤地),按通左之後都可以促進血液循環,都會令乳房健康啲,亦有機會因為健康咗,血液同養分流通得順暢左而對大小同胸型都有變化。不過效果就因人而異,但叫做係一個比較健康同自然嘅方法可以試吓!而且定期按摩胸部都係一個非常健康嘅做法,都有助通淋巴同避免乳腺有阻塞或者增生架。而且可以檢查返自己胸部有無硬塊,或者唔健康唔自然嘅情況。
我明白每個人都有自己想追求嘅嘢,但係每個女仔都有屬於個人嘅獨特體態,只要身體健康,其實就唔需要去在意社會大眾嘅標準。而呢啲標準其實都係傳媒同父權主義社會下嘅產物,並唔係一啲咁好嘅嘢。有時不斷勉強自己變成其他人嘅樣子會好辛苦架,不如慢慢發掘自己嘅特色,然後好好擁抱呢個獨特嘅自己。🧍♀️