我係18歲女仔，唔知點解身體好似異常多毛，喺胸部、肚、背脊等地方都會有好多毛（當然正常位置如四肢都有）。雖然唔係好黑好長，但問身邊朋友，佢地都好似無咁誇張。其實係唔係因為雄性激素過多呢？夏天著背心都十分困擾啊。
1.聽講食避孕藥可以增加返雌激素，唔知對改善呢樣野有無幫助呢？
2.我平時都有經痛問題，好似話避孕藥如Yaz 都較少負作用，而改善到經痛/經期情況，係咪真架？
3.避孕藥係咪可以令乳房變大？ 又多毛又平胸，係咪真係雄激素過多事？覺得自己好無女性應有嘅特徵。
聽人講依家新一代嘅避孕藥已經少左副作用，無論想改善經痛，定係改善多毛、平胸嘅問題，都好想試下，希望可以解答到我啦，謝謝。
仲有一個問題係我乳頭係凹入去，係因為胸部發育得唔好嗎？可以點解決？
因為你才是18歲, 如果沒太大需要(例如經血過多, 有實際醫學的需要), 又沒有避孕的需要, 我建議你最好還是跟醫生先商量才試… 我 encounter 了不少個案, 因為服避孕藥而有副作用, 包括一些與循環有關的嚴重問題。
平胸不一定不美, 最重要是你要對自已有自信, 大胸的女孩有她們不滿的地方! 最美的女孩是有自信的女孩!
你好啊！體毛會唔會濃密除咗雄性激素影響之外，好大機會受遺傳影響嘅，如果可以的話留意吓屋企人係咪都有類似嘅情況，如果父母都係比較多體毛，子女體毛旺盛嘅機會就會好大。
其實腹部、背脊呢啲位置有毛都係好正常嘅情況，而且毛髮本身係為咗幫助排汗同保護皮膚比較脆弱嘅身體部份例如性器官、腋下咁樣。至於生長速度同多少都好因人而異，就算生得多亦唔係有問題，唔需要太擔心架。
每個人身體會生長體毛，其實係一件好自然，好平常，每個人都會經歷嘅事，不過如果你會比較喜歡體毛數量少啲嘅自己，可以考慮脫毛嘅，市面上都有唔同嘅產品可以選擇。不過就要留意返自己肌膚嘅情況去選擇適合ge小心唔好自己同剃毛之後要擦返多啲cream保護翻皮膚。
現時避孕藥所含的雌激素只係少量，並唔會對你身體喞賀爾蒙有好大嘅影響，唔係一個長遠增加雌激素嘅方法。
至於坊間話食避孕藥會令胸部增大，其實係因為避孕藥裡面含有嘅少量雌激素，會令女性產生好似月經來潮之前會有嘅胸漲，因此有種錯覺個胸大咗，但係呢個都係一個暫時性嘅效果，只要停咗避孕藥，個效果就會消失。另外，以前有一啲舊配方嘅避孕藥，食完之後會增加體重，身體整體肥咗，個胸睇落就會大咗，但其實並唔係用嚟豐胸嘅，依家嘅避孕藥配方改良咗，應該就唔會有肥胖嘅問題出現。
避孕藥的確可以改善月經嘅規律，令月經規律化，減少經血量同埋舒緩經痛。值得留意嘅係，經痛原因有好多種架，所以要睇返你經痛嘅原因，有啲人經痛係因為卵巢或者子宮出現咗問題，因此有機會食咗都未必改善到你嘅情況。
同埋都係果句啦，始終係藥嚟，好睇個人身體狀況頂唔頂得順，食之前都要問返醫生建議。建議你可以去家計會度見下醫生，醫生會評估返你嘅身體狀況而推薦返你食邊一種避孕藥，之後家計會都會跟進返你嘅情況，定期約見你返去檢查下咁樣，我覺得咁樣都唔錯。同埋呢，係家計會買藥會比坊間藥房平啲架XDD
我睇到你話覺得自己無女性應有嘅特徵，感受到你好壓抑呀，好似俾社會嘅標準，旁人嘅眼光，自我否定壓住咗咁，好似如果我個胸唔夠大，腰唔夠瘦，皮膚唔夠白，就唔似女人咁，但我想話你知，你完完全全係一個女人，即使別人點樣談論，你依然係一個不折不扣嘅女人。如果你真係想好似坊間咁成為「更完美嘅女人」，你可以去努力，但並唔代表一定要同佢哋嘅標準一樣，你要記住，每個人都係獨一無二架，所以你唔一定要成為最靚果個，但可以成為有個性嘅你。
至於你講到乳頭凹入去嘅情況，就要睇返你係一出世就有定係突然之間變成咁樣。如果係一出世就係咁的話，大多數都係天生嘅，如果係最近先突然變成咁樣，最好都係搵醫生檢查一下，睇下會唔會有機會係乳房發炎或者有其他乳腺嘅狀況出現。